كەرە قارىس قارا قايشى... وزاعاڭنىڭ ءداۋ تسك-داعى ءداۋ ۇستەلىنىڭ ۇستىندە جاتاتىن كورىنەدى. نەمەسە سول ۇستەلدىڭ تارتپاسىندا تۇرادى. وزاعاڭ ونى قولىنا الدى دەگەنشە،.. ءبىتتى بار قاعازدىڭ شارۋاسى. قيادى، قىرقادى، كۇزەيدى. قيعاش كەتىپ بارا جاتقان قيامپۇرىستاۋ قۇجاتتى قيا باستىرمايدى. اڭىزعا اينالعان ابىزدىڭ ءبىر ءتالىمى وسى...
بۇل قايشى وزەكەڭمەن بىرگە تالاي ەستەلىكتىڭ كەيىپكەرى بولدى. ادەبيەتتانۋدىڭ بىلگىرى، ايدىك عالىم، اكادەميك سەيىت قاسقاباسوۆ تا قارا قايشىنى ەسكە العاندا ەرىكسىز ەزۋ تارتادى...
ءومىر بويى عىلىممەن اينالىسقان سەيىت اعامىز كۇندەردىڭ كۇنىندە ورتالىق كوميتەتكە جۇمىسقا كەلەم دەپ ويلاماپتى. سەكەڭ مەن تسەكاڭ ءبىر-بىرىنە ۇيلەسپەيتىن ەكى ءتۇرلى نارسە سياقتى ەدى. مەملەكەتتىك قىزمەتكە وزبەكالى جانىبەكوۆ شاقىردى. قاراماعىنداعى قىزمەتكەرلەرىنە تالابى وتە قاتال بولدى. ءوزىن دە، وزگەنى دە اياعان جوق. جازعان-سىزعانىڭدى مىندەتتى تۇردە كۇزەپ-تۇزەپ، ءوز بايلامىن ايتاتىن. قولىنان ۇزىن قايشىسى تۇسپەيتىن. قياتىن، وڭدەيتىن، جوندەيتىن. الدىنا قۇجات اپارىپ وتىرعاندا وزەكەڭ ۇستەلىنىڭ تارتپاسىنان جالاڭداتىپ قايشىسىن شىعارعاندا قىزمەتكەرلەردىڭ جۇرەكتەرى سۋ ەتە قالاتىن. وسىنىڭ وزىنەن جەتكىلىكتى ءتالىم الدى. سول قايشى كوپ نارسەگە ۇيرەتتى.
وزاعاڭنان ونەگە، قايشىدان قايراۋ كورگەن سەيىت اعا كەيىن تاۋەلسىز قازاقستاننىڭ تۇڭعىش جوعارى اتتەستاتسيالىق كوميسسياسىنىڭ توراعاسى بولىپ بەكىتىلدى. كوميسسيا قيىن كەزەڭدە قۇرىلدى. جاسىراتىنى جوق، «مۇنداي ۇيىمنىڭ ەندى كەرەگى از. بۇل – كومپارتيانىڭ ويلاپ تاپقانى» دەگەن پىكىرلەر كوپ ايتىلىپ جاتقان كەز ەدى. بىرقاتار شەنەۋنىكتەر «حالىقارالىق ستاندارت دەگەن بار. ەشقانداي قورعاۋدىڭ قاجەتى جوق»، - دەگەندى كولدەنەڭ تارتتى. سودان 13 ەۋروپالىق ەلدىڭ تاجىريبەسى زەرتتەلدى. حالىقارالىق ستاندارت دەگەن جوق بولىپ شىقتى. 11 ەلدىڭ مەكەمەسى بىرلەسىپ، قاۋىمداستىق قۇردى. شتاب-پاتەرى الماتىعا ورنالاستى.
توراعاسى سەكەڭ بولدى. كانديداتتىق پەن دوكتورلىق دارەجە، دوتسەنتتىك پەن پروفەسسورلىق اتاق سول كۇيىندە قالدىرىلدى.
سەيىت اعا ءوز تۇسىندا قورعاۋ ءتارتىبىن ءبىراز جەڭىلدەتۋگە كۇش سالدى. قولدان جاسالعان ءتۇرلى كەدەرگىلەر كوپ ەدى. سونىڭ ءبارىن الىپ تاستاۋعا تىرىستى. اكادەميالىق ينستيتۋتتار عالىمدارىنىڭ قۇقى جوعارى وقۋ ورىندارى عالىمدارىنىڭ قۇقىمەن تەڭەستىرىلدى. اكادەميادا قىزمەت ىستەيتىن عىلىم دوكتورلارىنىڭ پروفەسسور اتاعىنا تەزدەتىپ قول جەتكىزۋىنە مۇمكىندىك جاسالدى. بۇرىن بۇل قيىننىڭ قيىنى ەدى. اكادەمياداعىلارعا ەسكى ۇلگىدەگى اعا عىلىمي قىزمەتكەر دەيتىن اتاق بەرىلەتىن. سونى جويدى. بۇل ءۇشىن تەك قانا ەلدىڭ العىسىن الدى.
ءسويتىپ، ونى وزاعاڭنىڭ قوس قارىس قايشىسى تەك قاعاز-پاعازدىڭ ارتىق-اۋىس تۇسىن عانا ەمەس، ءومىر تاجىريبەسىندە بايقالعان قاجەتسىزدەۋ نارسەلەردى دە قىرقىپ-قىرناي تۇسۋگە باۋلىدى. سوندىقتان سەكەڭ وسى اعاسىن ويعا السا، ەسىنە ونىڭ ۇزىن قايشىسى قوسا تۇسەدى...
مىنە، كوردىڭىز بە، قايشىلاۋ مەن قامشىلاۋ ادامنىڭ بولمىس-بىتىمىنە قالاي اسەر ەتكەن؟! ال وزاعاڭ قايشىسىنىڭ قايىرىن كورگەندەر قانشاما؟!
* * *
بۇگىن مەملەكەت جانە قوعام قايراتكەرى وزبەكالى جانىبەكوۆتىڭ تۋعان كۇنى. رۋحى شات بولسىن ارداقتى اعامىزدىڭ! قايراتكەردىڭ قايشىسى قازىر قاي مۇراجايدا تۇر ەكەن؟!
