World Boxing ūiymy Reseidıŋ barlyq jas sanatyndaǧy boksşylaryna halyqaralyq jarystarǧa ūlttyq tuy men änūranymen qatysuǧa rūqsat berdı. Būl turaly Reseidıŋ sport ministrı Mihail Degtiariov aitty, dep habarlaidy "Adyrna".
"Resei boksy älemdık arenaǧa qaita oralyp jatyr. World Boxing ūiymy bızdıŋ sportşylarymyzdy barlyq jas sanatynda ūlttyq tu men memlekettık änūranmen barlyq halyqaralyq jarystarǧa qatystyru turaly şeşım qabyldady. Resei boks federasiiasy 2026 jyldyŋ basynda World Boxing ūiymynyŋ tolyqqandy müşesı atandy.
Qalypty sporttyq bailanystardy qalpyna keltıru mäselesın bız World Boxing prezidentı, Qazaqstan Ūlttyq olimpiadalyq komitetınıŋ basşysy Gennadii Golovkinmen 2026 jyldyŋ qaŋtarynda Taşkentte ötken kezdesude talqyladyq", - dedı ol.
Degtiariovtıŋ aituynşa, Halyqaralyq federasiianyŋ būl şeşımı erekşe maŋyzdy.
"Öitkenı, däl osy World Boxing ūiymyna Halyqaralyq olimpiada komitetı Olimpiada oiyndaryndaǧy boks turnirın ötkızu qūqyǧyn bergen. Resei boks federasiiasynyŋ ūiymǧa tolyqqandy müşe boluy reseilık boksşylarǧa halyqaralyq jarystar küntızbesıne, sonyŋ ışınde Olimpiada siklındegı turnirlerge tolyqqandy qatysuǧa jol aşady.
Bız reseilık sportty älemdık sport qauymdastyǧyna kezeŋ-kezeŋımen qaita qaitaru jūmysyn jalǧastyryp jatyrmyz", — dep jazdy Degtiariov özınıŋ Telegram-arnasynda.
Resei boks federasiiasy World Boxing ūiymynyŋ qūramyna 2026 jyldyŋ basynda qabyldanǧan bolatyn.
