«Kásipqoı boks áleminde úzdik tanylǵan, elimizdi kúlli álemge tanytqan Gennadıı Golovkınge eskertkish qoıý kerek». Almatyda Ulystyń uly kúni qarsańynda ótetin kásipqoı boks keshiniń baspasóz jıynynda belgili bapker Saǵatbek Musahanov osylaı dedi, dep habarlaıdy "Adyrna" ulttyq portaly Azattyq Ruhy-na silteme jasap.
Saǵatbek Musahanov – Jańqosh Turarovtyń jeke bapkeri. Alaıda bapker jastarǵa úlgi bolǵan, el namysyn halyqaralyq arenalarda uzaq jyl qorǵap kelgen Gennadıı Golovkınge eńseli eskertkish turǵyzý kerek ekenin aıtty.
«Jańqoshpen uzaq jyl birge kele jatyrmyn. Armanym – ony álem chempıony qylý. Ol armanyma bir qadam jaqyndaǵan sııaqtymyn. Biraq men osy jıynda basqa bir usynysty aıtqym keledi. Jýyrda Meksıka eli ardaqty uly, kásipqoı boksshy Saýl Alvareske (57-2-2, 39 KO) úlken eskertkish turǵyzdy. Ol eliniń atyn shyǵarýǵa eńbek sińirdi. Ol bizdiń maqtanyshymyz Genamen de sharshy alańǵa shyqqan. Gennadıı Golovkın (42-1-1, 37 KO) Qazaqstannyń atyn álemge pash etti. Golovkınge eskertkish qoıý kerek dep sanaımyn. Onyń eńbekqorlyǵy – jastarǵa úlgi», - dedi bapker Saǵatbek Musahanov.
"Adyrna" ulttyq portaly
