«Kıtap oqityn ūlt» respublikalyq jobasynyŋ kartasy keŋeiıp keledı. Bügın jalpyūlttyq bastamaǧa bırden üş öŋır – Jambyl, Abai jäne Pavlodar oblystary qosyldy.
«Kıtap oqityn ūlt – Chitaiuşaia nasiia» qoǧamdyq qorynyŋ töraǧasy Baqytjan Tūrlybekovtıŋ öŋır basşylarymen ötkızgen jūmys kezdesulerı aiasynda kıtap oqu mädenietın damytuǧa jäne jobany öŋırlerde ıske asyruǧa baǧyttalǧan yntymaqtastyq turaly memorandumdarǧa qol qoiyldy.
Jobaǧa qosylǧan ärbır öŋır Qazaqstannyŋ ruhani-mädeni kartasynda airyqşa oryn alady. Jambyl oblysy – Bauyrjan Momyşūly düniege kelgen qasiettı ölke. Onyŋ «Ūşqan ūia» şyǧarmasy respublikalyq «Kıtap oqityn ūlt» kıtap oqu marafonynyŋ ūsynylǧan ädebietter tızımıne engızılgen. Abai oblysy – qazaqtyŋ ūly oişyly Abai Qūnanbaiūly men Şäkärım Qūdaiberdıūlynyŋ tuǧan jerı, olardyŋ ädebi-filosofiialyq mūrasy ūlttyq ruhaniiattyŋ berık negızıne ainaldy. Pavlodar oblysy – Mäşhür Jüsıp pen Sūltanmahmūt Toraiǧyrovtyŋ qasiettı mekenı. Olar qazaq ädebietı men aǧartuşylyq oiynyŋ damuyna ölşeusız üles qosty.
Sondyqtan būl öŋırlerdıŋ jobaǧa qosyluynyŋ simvoldyq mänı erekşe. «Kıtap oqityn ūlt» bastamasy öŋırlerdı ǧana emes, elımızdıŋ bai ädebi mūrasyn da bır arnaǧa toǧystyryp, klassikalyq şyǧarmalar arqyly jaŋa buynnyŋ dünietanymyn qalyptastyratyn bırtūtas oqu keŋıstıgın qūrudy maqsat etedı.
Joba aiasynda atalǧan üş öŋırde mektep oquşylary, studentter, pedagogter, memlekettık qyzmetşıler, sport salasynyŋ ökılderı, eŋbek ūjymdary men otbasylar arasynda kıtap oqudy nasihattauǧa, oqu mädenietın damytuǧa jäne otbasylyq kıtap oqu dästürın nyǧaituǧa baǧyttalǧan auqymdy ıs-şaralar jüzege asyrylady.
«Kıtap oqityn ūlt – Chitaiuşaia nasiia» qoǧamdyq qorynyŋ töraǧasy Baqytjan Tūrlybekov jobanyŋ keŋeiuı jalpyūlttyq kıtap oqu qozǧalysyn qalyptastyrudaǧy jaŋa kezeŋ ekenın atap öttı.
«Jobaǧa qosylǧan ärbır jaŋa öŋır – "Kıtap oqityn ūlt" tarihyndaǧy jaŋa tarau. Bügın bastamaǧa Qazaqstanǧa ūly aqyndar men jazuşylardy, oişyldar men aǧartuşylardy syilaǧan öŋırler qosylyp otyr. Olardyŋ mūrasy kıtaptyŋ qaşanda bılımnıŋ, ruhani qūndylyqtardyŋ jäne ūlttyq sananyŋ qainar közı bolǧanyn aiqyn körsetedı. Bızdıŋ maqsatymyz – qazaq ädebietınıŋ taŋdauly tuyndylaryn balalardyŋ, jastardyŋ jäne ärbır otbasynyŋ kündelıktı ömırınıŋ ajyramas bölıgıne ainaldyru», – dedı Baqytjan Tūrlybekov.
Aldaǧy uaqytta Jambyl, Abai jäne Pavlodar oblystarynda öŋırlık jobalyq keŋseler qūrylyp, bılım beru jäne mädeniet ūiymdarynda üilestıruşıler aiqyndalady. Sonymen qatar qatysuşylardy tırkeuge jäne oqylǧan kıtaptardy esepke aluǧa arnalǧan sifrlyq platforma ıske qosylady. Jobaǧa auyldyq jäne şalǧai eldı mekenderdıŋ tūrǧyndaryn keŋınen tartuǧa erekşe nazar audarylyp, ärbır otbasynyŋ qatysuyna mümkındık jasalady.
Osylaişa «Kıtap oqityn ūlt» jobasy Qazaqstandy ortaq qūndylyq – kıtaptyŋ töŋıregıne bırıktırıp, eldıŋ ziiatkerlık bolaşaǧyn qalyptastyru jolynda senımdı qadam jasap keledı.
