Abai oblysynda III oblystyq «Myŋ bala» mädeni-aǧartuşylyq baiqauynyŋ öŋırlık ırıkteu kezeŋı öz märesıne jettı. Biylǧy baiqauǧa öŋırdıŋ tükpır-tükpırınen 33 önerpaz qatysyp, «Äleumettık jelılerdegı mänerlep oqu» jäne «Bırlıkke ün qosqan» muzykalyq nominasiialary boiynşa baq synady. Qazylar alqasy qatysuşylardyŋ oryndauşylyq şeberlıgın, şyǧarmany körkem jetkızu mänerın, qazaq tılın meŋgeru deŋgeiın jäne şyǧarmaşylyq erekşelıgın baǧalady.
Abai oblysynyŋ ışkı saiasat basqarmasynyŋ basşysy Jarqyn Tüsıpbekūly baiqaudyŋ memlekettık tıldı damytu men qoǧamdyq kelısımdı nyǧaitudaǧy maŋyzyn atap öttı.
– Memleket basşysy jastardyŋ qoǧamdyq kelısım men etnosaralyq tatulyqty saqtauda, memlekettık tıldıŋ qoldanys aiasyn keŋeitude maŋyzdy röl atqaratynyn ünemı aityp keledı. Osy tūrǧyda «Myŋ bala» jobasy da öz nätijesın körsetıp otyr. Jobaǧa qatysqan jastar memlekettık tıldı meŋgerıp qana qoimai, qazaq halqynyŋ mädenietı men salt-dästürın tanyp, öz önerı men qabıletın damytuǧa mümkındık alady. Bügınde olardyŋ arasynan türlı salada eŋbek etıp, el damuyna üles qosyp jürgen azamattar bar. Būl – jobanyŋ naqty nätijesı. «Myŋ bala» memlekettık tıldı üirenuge yntalandyryp, el bırlıgın nyǧaituǧa baǧyttalǧan maŋyzdy alaŋ, – dedı basqarma basşysy.
Öŋırlık kezeŋnıŋ qorytyndysy boiynşa Semei qalasyndaǧy Q.Sätbaev atyndaǧy №2 mekteptıŋ 5-synyp oquşysy Soloviova Sofiia jeŋımpaz atanyp, respublikalyq kezeŋge joldama aldy. Ol aldaǧy baiqauda Abai oblysynyŋ namysyn qorǧaidy.
Sondai-aq, «Äleumettık jelılerdegı mänerlep oqu» nominasiiasynda Malsev Ruslan I orynǧa ie bolsa, Tlekūly Dınmūhamed II oryn, Suleimenova Aiaulym III oryndy ielendı. Al «Bırlıkke ün qosqan» muzykalyq nominasiiasynda Soloviova Sofiia jeŋımpaz atansa, Aşimova Kamilla II orynǧa, Zagidullina Naima III orynǧa laiyq dep tanyldy.
Baiqau qorytyndysynda jeŋımpazdar men jüldegerler diplomdarmen jäne baǧaly syilyqtarmen marapattaldy.
