Búgin táýelsiz jýrnalıst, KazTAG halyqaralyq aqparattyq agenttiginiń jetekshisi, Áset Mataev Almatydaǵy №5 bir mandatty okrýg boıynsha QR Parlament Májilisi depýtattarynyń kezekten tys saılaýyna óz kandıdatýrasyn usynatynyn málimdedi (eskertpe. - Bostandyq, Medeý, Naýryzbaı aýdandary - Á.Mataev turǵan, turatyn jáne jumys isteıtin aýdandar). Bul týraly Áset Mataev Facebook-tegi resmı paraqshasynda, sondaı-aq jeke Telegram-arnasynda jazdy, dep habarlaıdy “Adyrna” ulttyq portaly.
Jazbada alty aı buryn Joǵarǵy Sot QazTAG jáne Qazaqstan jýrnalıster odaǵynyń jetekshileri Áset pen Seıtqazy Mataevtardan zańsyz sottaǵany úshin memleket atynan keshirim suraǵany jáne mundaı jaıt Táýelsiz Qazaqstan tarıhynda alǵash ret oryn alǵany aıtylǵan.
⠀"Bir kezderi saıası sebeptermen bastalǵan qylmystyq is Bas Prokýratýra qyzmetkerleriniń muqııat tekserisinen keıin joıyldy jáne qazir Joǵarǵy Sottyń bıýlleteninde zańsyz sottaýdyń mysaly retinde jarııalanyp jatyr. Meniń túsinigimde Ádiletti Qazaqstan degenimiz osy - barlyq adam quqyǵy zańmen qorǵalyp, qylmys aıaýsyz jazalanatyn el", - dep jazdy A.Mataev.
Sonymen qatar ol óziniń atyna memlekettik organdardyń zańsyz is-áreketterine qatysty halyqtan kóp shaǵym túsetinin jáne sol ótinish-shaǵymdardyń barlyǵyn jan-jaqty tekserý qajet ekenin atap ótti.
"Meni sońǵy kezderi ózimniń qalamdas áriptesterime, ıaǵnı tilshilerge qatysty sóz bostandyǵyn shektep, ádildikti belden basý oqıǵalarynyń kóbeıip ketkeni qatty alańdatady. Óıtkeni, mundaı taýqymetti bizdiń otbasymyz da talaı márte basynan keshirgen. Sóz bostandyǵy jolynda basymyzdy báıgege tigip, biraz ómirimizdi tárk ettik. Densaýlyǵymyzǵa da qandaı nuqsan kelgeni aıtpasa da túsinikti. Sońǵy jyldary biz meniń áriptesterime, jýrnalısterge jáne qoǵam belsendilerine jasalǵan qatigez soqqylarǵa kýá boldyq", - delingen habarlamada.
Áset Mataevtyń sózinshe, adamdar oǵan óńirler men ortalyq memlekettik organdardaǵy kadrlyq sheshimderge qatysty suraqtardy, kommýnaldyq saladaǵy problemalar men sybaılas jemqorlyqqa qatysty suraqtardy jıi qoıady eken. Úkimet pen parlamentke jańa kózqarastaǵy belsendi adamdar qajet. Memlekettik apparat bıýrokratııa men qaǵazbastylyqqa kómilip qaldy. Shuǵyl sheshimder qabyldaý bylaı tursyn, moınyna jaýapkershilik alýdan qashatyn boldy.
"Bizde ekologııa, jumyssyzdyq jáne qaýipsizdikke qatysty problemalar tolyp tur. Kóptegen júıelik problemalar paıda boldy. Áreket etetin kez keldi. Kez kelgen máseleniń sońǵy sheshimin tabýdy prezıdenttiń moınyna ilip qoıý durys emes dep sanaımyn. Sheneýnikter qoǵamnyń ózimen qoıan-qoltyq aralasa júrip, halyqtyń talabyn birlesip sheshý jolynda alǵa basýy qajet... Barlyǵy ózgeris pen damýdy qalaıdy. Bireý ony shetelden izdeıdi, biraq men óz ómirimdi Otanymmen baılanystyramyn. Bizdiń býyn kóptegen máselelerdi sheshe alady jáne Qazaqstandy damý men zańdylyq jolyna baǵyttaı alady!"- dep qorytyndylady Áset Mataev.
Atap ótilgendeı, Á. Mataevty jastar ókilderi, qoǵam qaıratkerleri, óner adamdary, ártúrli óńirlerde BAQ salasynda jumys isteıtin áriptesteri qoldaıdy.
