Bügın täuelsız jurnalist, KazTAG halyqaralyq aqparattyq agenttıgınıŋ jetekşısı, Äset Mataev Almatydaǧy №5 bır mandatty okrug boiynşa QR Parlament Mäjılısı deputattarynyŋ kezekten tys sailauyna öz kandidaturasyn ūsynatynyn mälımdedı (eskertpe. - Bostandyq, Medeu, Nauryzbai audandary - Ä.Mataev tūrǧan, tūratyn jäne jūmys ısteitın audandar). Būl turaly Äset Mataev Facebook-tegı resmi paraqşasynda, sondai-aq jeke Telegram-arnasynda jazdy, dep habarlaidy “Adyrna” ūlttyq portaly.
Jazbada alty ai būryn Joǧarǧy Sot QazTAG jäne Qazaqstan jurnalister odaǧynyŋ jetekşılerı Äset pen Seitqazy Mataevtardan zaŋsyz sottaǧany üşın memleket atynan keşırım sūraǧany jäne mūndai jait Täuelsız Qazaqstan tarihynda alǧaş ret oryn alǧany aitylǧan.
⠀"Bır kezderı saiasi sebeptermen bastalǧan qylmystyq ıs Bas Prokuratura qyzmetkerlerınıŋ mūqiiat tekserısınen keiın joiyldy jäne qazır Joǧarǧy Sottyŋ biulletenınde zaŋsyz sottaudyŋ mysaly retınde jariialanyp jatyr. Menıŋ tüsınıgımde Ädılettı Qazaqstan degenımız osy - barlyq adam qūqyǧy zaŋmen qorǧalyp, qylmys aiausyz jazalanatyn el", - dep jazdy A.Mataev.
Sonymen qatar ol özınıŋ atyna memlekettık organdardyŋ zaŋsyz ıs-äreketterıne qatysty halyqtan köp şaǧym tüsetının jäne sol ötınış-şaǧymdardyŋ barlyǧyn jan-jaqty tekseru qajet ekenın atap öttı.
"Menı soŋǧy kezderı özımnıŋ qalamdas ärıptesterıme, iaǧni tılşılerge qatysty söz bostandyǧyn şektep, ädıldıktı belden basu oqiǧalarynyŋ köbeiıp ketkenı qatty alaŋdatady. Öitkenı, mūndai tauqymettı bızdıŋ otbasymyz da talai märte basynan keşırgen. Söz bostandyǧy jolynda basymyzdy bäigege tıgıp, bıraz ömırımızdı tärk ettık. Densaulyǧymyzǧa da qandai nūqsan kelgenı aitpasa da tüsınıktı. Soŋǧy jyldary bız menıŋ ärıptesterıme, jurnalisterge jäne qoǧam belsendılerıne jasalǧan qatıgez soqqylarǧa kuä boldyq", - delıngen habarlamada.
Äset Mataevtyŋ sözınşe, adamdar oǧan öŋırler men ortalyq memlekettık organdardaǧy kadrlyq şeşımderge qatysty sūraqtardy, kommunaldyq saladaǧy problemalar men sybailas jemqorlyqqa qatysty sūraqtardy jiı qoiady eken. Ükımet pen parlamentke jaŋa közqarastaǧy belsendı adamdar qajet. Memlekettık apparat biurokratiia men qaǧazbastylyqqa kömılıp qaldy. Şūǧyl şeşımder qabyldau bylai tūrsyn, moinyna jauapkerşılık aludan qaşatyn boldy.
"Bızde ekologiia, jūmyssyzdyq jäne qauıpsızdıkke qatysty problemalar tolyp tūr. Köptegen jüielık problemalar paida boldy. Äreket etetın kez keldı. Kez kelgen mäselenıŋ soŋǧy şeşımın tabudy prezidenttıŋ moinyna ılıp qoiu dūrys emes dep sanaimyn. Şeneunıkter qoǧamnyŋ özımen qoian-qoltyq aralasa jürıp, halyqtyŋ talabyn bırlesıp şeşu jolynda alǧa basuy qajet... Barlyǧy özgerıs pen damudy qalaidy. Bıreu ony şetelden ızdeidı, bıraq men öz ömırımdı Otanymmen bailanystyramyn. Bızdıŋ buyn köptegen mäselelerdı şeşe alady jäne Qazaqstandy damu men zaŋdylyq jolyna baǧyttai alady!"- dep qorytyndylady Äset Mataev.
Atap ötılgendei, Ä. Mataevty jastar ökılderı, qoǧam qairatkerlerı, öner adamdary, ärtürlı öŋırlerde BAQ salasynda jūmys ısteitın ärıptesterı qoldaidy.
