Jetısu oblysynda Memleket basşysynyŋ tapsyrmasyna säikes inkliuzivtı sport keşenınıŋ qūrylysy bastaldy. Osyǧan orai bügın Taldyqorǧan qalasyndaǧy qūrylys alaŋyna Uaqyt kapsulasy salyndy.
Saltanatty şaraǧa oblys äkımı Beibıt İsabaev, «Qazaqstan halqyna» qorynyŋ Basqarma töraiymy Läzzat Şyŋǧysbaeva, erekşe qajettılıgı bar sportşylar qatysty.
Aldymen jinalǧan qauymdy jaŋa inkliuzivtı nysan qūrylysynyŋ bastaluymen oblys äkımı qūttyqtady.
- Memleket basşysy Qasym-Jomart Kemelūly Toqaev inkliuzivtı sport ortalyqtaryn aşu turaly tapsyrma bergen bolatyn. Soǧan säikes bügın arnaiy sport keşenınıŋ qūrylysyn bastap otyrmyz. Bolaşaqta būl nysan 22 sport türınen käsıbi şeberlıktı jetıldıruge mümkındık beredı. Jalpy, bızdıŋ öŋırde parasport qarqyndy damyǧan. Oblys qūrylǧannan berı parasportşylarymyz türlı deŋgeidegı jarystarda jalpy sany 1300-den astam medal ielendı. Men barlyq parasportşylarǧa ömırdıŋ türlı qiyndyqtaryna moiymai, sportpen ainalysyp, Qazaqstannyŋ atyn şyǧaryp, kök tuymyzdy jelbıretıp jürgenı üşın ülken alǧysymdy aitamyn. Bız būdan bylai da parasportty ary qarai damytudy jalǧastyramyz, - degen Beibıt İsabaev osy jobaǧa qarjylai qoldau körsetken «Qazaqstan halqyna» qoǧamdyq qoryna şynaiy rizaşylyǧyn bıldırdı.
Mūnan soŋ söz alǧan Qordyŋ Basqarma töraiymy Läzzat Şyŋǧysbaeva būl ortalyqty salu qoljetımdı ortany qalyptastyru jolyndaǧy maŋyzdy qadam ekendıgın atap öttı.
- Bız būǧan deiın Astana jäne Qyzylorda qalalarynda osyndai inkliuzivtı sport ortalyqtaryn saldyq, bügın üşınşı bolyp Taldyqorǧanda qūrylysy bastalyp otyr. Būl jerde tek sportpen şūǧyldanu ǧana emes, sonymen qatar oŋaltuǧa arnalǧan qūral-jabdyqtar bolady, medisina bölımderı qarastyrylady, öitkenı erekşe qajettılıgı bar azamattar üşın onyŋ öz bekıtılgen standarttary bar. Sol siiaqty qordyŋ qarjysyna Üştöbede sport keşenı salynady, - dedı L. Şyŋǧysbaeva.
Būdan ärı ışıne keleşek ūrpaqqa arnalǧan amanat haty bar Uaqyt kapsulasyn salu räsımı atqaryldy.
Öz kezegınde parapauerliftingıden Qazaqstan Respublikasynyŋ eŋbek sıŋırgen sport şeberı, Rio Paralimpiada oiyndarynyŋ kümıs jüldegerı, Älem chempionatynyŋ jäne Qazaqstan Respublikasynyŋ bırneşe dürkın chempiony Rauşan Qoişybaeva:
- Mūndai qoldau bızge, sportşylarǧa ülken motivasiia beredı, küş-jıgerımızdı eselei tüsedı. Osydan bırneşe jyl būryn Astanadaǧy paralimpiada jattyǧu ortalyǧyna kırgende keremet qyzyqqan edım. Ondai zalda sportşy barlyq jaǧynan yŋǧaily bolǧandyqtan rahattanyp tūryp jattyǧu jasaidy. Sol kezde bızde qaşan salynady eken dep armandap edım. Bügın, mıne, sol armanymyz oryndalatyn künge de jettık. Bız aldaǧy uaqytta da halyqaralyq arenalarda barymyzdy salyp, eldıŋ namysyn abyroimen qorǧai beremız, - dedı ol.
Saltanatty şara soŋynda oblys äkımı men Qor basşysy sportşylarmen tıldesıp, jaŋa keşennıŋ mümkındıkterı, būdan bölek qolǧa alynatyn basqa da jobalar jaily baiandap berdı.
Jalpy audany 2 641 m² bolatyn inkliuzivtı sport keşenınde ämbebap sport zaly, mamandandyrylǧan jattyǧu alaŋdary, küres jäne küştık daiyndyq zaldary, oq atu tirı, sadaq atu alaŋy, medisinalyq blok, sondai-aq jattyǧular, jarystar men oŋaltu ıs-şaralaryn ötkızuge qajettı infraqūrylym qarastyrylǧan. Nysan kedergısız orta qaǧidattaryn eskere otyryp jobalanǧan jäne bır mezgılde 150-ge deiın keluşını qabyldai alady. Ǧimarat halyqtyŋ jürıp-tūruy şekteulı toptaryna beiımdelgen jolauşylar liftısımen jabdyqtalady.
Jobany ıske asyru erekşe qajettılıkterı bar adamdardyŋ sportpen tūraqty türde ainalysuǧa tartyluyna, olardyŋ fizikalyq jäne psihologiialyq densaulyǧyn nyǧaituǧa, sondai-aq äleumettık beiımdelu men qoǧamdyq ömırge qatysu mümkındıkterın keŋeituge yqpal etedı.
Atap ötsek, qazırgı taŋda oblystaǧy «Dene mümkındıkterı şekteulı tūlǧalarǧa arnalǧan sporttyq daiarlau ortalyǧy» KMM-ınde sportşylar sporttyŋ 24 türımen şūǧyldanady. Sonyŋ ışınde paralimpialyq jäne paralimpialyq emes, surdlimpialyq jäne surdlimpialyq emes, arnaiy olimpiada sport türlerı bar. Qazırgı taŋda ortalyqta 360 sportşy jüielı türde sportpen ainalysady. Onyŋ ışınde 287 sportşy - sporttyq ataqtar men sporttyq razriadtardyŋ iegerlerı. Sol qatarda auyr atletikadan Paralimpiada oiyndarynyŋ kümıs jüldegerı Rauşan Qoişybaeva, grek-rim küresınen Surdlimpiada oiyndarynyŋ qola jüldegerı Ramazan Äbdrasıl, parapauerliftingten Älem chempiony Rahmetjan Hamaev siiaqty sport jūldyzdary bar.
