Jetısu oblysynda «Taza Qazaqstan» ekologiialyq baǧdarlamasy aiasynda jalpyoblystyq senbılık öttı. Auqymdy şaraǧa öŋırdegı barlyq eldı mekenderdıŋ tūrǧyndary, memlekettık organdardyŋ, käsıporyndar men kommunaldyq mekemelerdıŋ qyzmetkerlerı, sondai-aq volonterler, eko-belsendıler jäne ükımettık emes ūiymdardyŋ ökılderı qatysty. Osy künı Taldyqorǧan qalasyndaǧy «Qaratal» şaǧyn audanynda ornalasqan Jetısu universitetınıŋ studenttık jataqhanasy aumaǧynda oblys äkımı Beibıt İsabaev jastarmen bırge aumaqty kögaldandyru jūmystaryna qatysyp, 50 qylqan japyraqty aǧaş otyrǧyzdy. Jalpy, būl senbılık aiasynda oblys boiynşa 8 myŋnan astam aǧaş otyrǧyzyldy, - dep habarlaidy Jetısu oblysy äkımınıŋ baspasöz qyzmetı.
Jasyl jelekterdı egıp bolǧan soŋ öŋır basşysy senbılıkke kelgen jastarmen äŋgımelesıp, öskeleŋ ūrpaqtyŋ jan-jaqty damuynyŋ maŋyzdylyǧyn atap öttı.
– Bügıngı zaman – sifrlandyru ǧasyry, sifrlyq sauattylyq jastar üşın asa qajet. Ekonomikanyŋ damuy jaŋa tehnologiiaǧa, tereŋ bılımge, är adamnyŋ özın-özı tärbieleuıne, tabiǧatqa, qoǧam ısıne jauapkerşılıkpen qarauǧa tıkelei bailanysty. Sondyqtan ünemı bılım alyp, üzdıksız özderıŋdı damyp otyru qajet, – dedı Beibıt İsabaev.
Taldyqorǧan qalasy äkımdıgınıŋ mälımetınşe, bügıngı senbılık barysynda 2000 dana şaruaşylyq qūral-jabdyǧy taratylyp, 44 bırlık arnaiy tehnika jūmyldyryldy, 238 tonna qoqys şyǧaryldy. Sonymen qatar kögaldandyru jūmystaryna erekşe köŋıl bölınude. Biyl Taldyqorǧanda 13 myŋ aǧaş otyrǧyzu josparlanǧan, onyŋ 2 myŋy köktemde, 11 myŋy küzde egılmek. Qazırgı uaqytta 200-den astam köşet otyrǧyzyldy, qalǧany säuır aiynyŋ soŋyna deiın egıledı. Otyrǧyzylǧan aǧaştarǧa kütım jasau jūmysy da jüielı jürgızıledı.
Tazalyq şarasy turaly qatysuşylardyŋ bırı Sabina Nūrahmet pıkır bıldırdı:
– Men «Avisenna» medisinalyq kolledjınıŋ 1-kurs studentımın. «Meiırger ısı» mamandyǧy boiynşa bılım alyp jatyrmyn. Osyndai qoǧamdyq ıs-şaralarǧa ünemı qatysamyn. Bügın bız aǧaş otyrǧyzyp, aumaqty tazalau jūmystaryna atsalystyq. Aldaǧy uaqytta da osy jasyl jelekterge kütım jasauǧa qatysatyn bolamyz. Tabiǧatqa qamqorlyq jasau – bızdıŋ paryzymyz, – dedı ol.
Sondai-aq Eskeldı audany Kökjazyq auylynyŋ tūrǧyny da oi qosty:
– Bız är senbı saiyn auylymyzdy tazalau jūmystaryna qatysamyz. Bügın aǧaş dıŋderın äktedık, aumaqty tazalap, qoqystan arylttyq. Auylymyz taza ärı körıktı bolǧanyn qalaimyz, sondyqtan oǧan öz ülesımızdı qosamyz, - dedı ol.
Jalpy oblys boiynşa senbılıkke 15 myŋnan astam adam qatysyp, 225 bırlık tehnika jūmyldyryldy. Öŋırdıŋ eldı mekenderınde 8 myŋnan astam aǧaş otyrǧyzyldy, onyŋ 6800-ı japyraqty, 1426-sy qylqan japyraqty aǧaştar.
Al jyl basynan berı oblystyŋ sanitarlyq tazalyǧyna 37 myŋnan astam adam qatysyp, 576 bırlık tehnika paidalanylǧan. Sonyŋ nätijesınde 3,9 myŋ tonnadan astam qoqys şyǧarylyp, şamamen 19,9 myŋ aǧaş otyrǧyzyldy.
Taǧy bır atap öterlıgı, qazırgı uaqytta Taldyqorǧan qalasynda abattandyru baǧytyndaǧy infraqūrylymdyq jobalar jüzege asyryluda. Sonyŋ bırı Qaratal özenınıŋ jaǧalauynda 9 gektar aumaqta avtomatty suaru jüiesın ornatu jūmystary jürgızılıp jatyr. Atalǧan qūrylys uchaskesıne jauapty Baǧdat Tasbolatovtyŋ aituynşa, jūmystar nauryz aiynda bastalyp, mamyr aiynyŋ ortasynda aiaqtalady, nysanda şamamen 40 adam eŋbek etude. Qazırgı taŋda jalpy jūmys kölemınıŋ şamamen 50%-y oryndaldy. 40 myŋ şarşy metr jasyl gazon aumaǧynda 44 magnittık klapan ornatylyp, är aimaq jeke-jeke suarylatyn bolady. Sumen qamtamasyz etu üşın jeke ūŋǧyma qazyluda.
Osyndai jūmystar «Jastar» saiabaǧynda da jürgızılude, mūnda jaŋbyrlatyp suaru jüiesı 4 gektar aumaqty qamtidy. Jobaǧa merdıger ūiymnyŋ 20 jūmysşysy men 12 bırlık tehnikasy jūmyldyrylǧan. Qazırgı uaqytta jūmystardyŋ 30%-y oryndaldy, jobany belgılengen merzımnen būryn — şamamen mausym–şılde ailarynda aiaqtau josparlanyp otyr.
