Taldyqorǵanda saılaýǵa túıe minip kelgen jergilikti turǵyn jurttyń nazaryn aýdartty. Bul týraly Jetisý oblysy ákiminiń baspasóz qyzmeti jarııalady, dep habarlaıdy “Adyrna” ulttyq portaly.
Aqparat boıynshp, taldyqorǵandyq Ulan Baızaqov tańerteń kelip, óziniń kandıdaty úshin birinshi bolyp daýys berdi.
Ár demalys nemese mereke saıyn balalar men eresekterdi túıesimen serýendetetin jigit saılaýǵa túıe minip, baıan oınatyp, dýmandatyp keldi.
"Aptanyń demalys kúnderi túıemdi ortalyq saıabaqtarǵa alyp shyǵamyn. Ústine mingenine qýanǵan balalardy kórýdiń ózi ǵanıbet. Osyndaı qyzmet kórsetýden tapqan qarajatty túıeniń jem-shóbine, dári-dármegine jumsaımyn. Búgingi saılaýǵa erteletip kelip, daýys berdim. Sebebi kúni boıy túıe baǵymyna qatysty atqaratyn sharýam kóp", - deıdi Ulan Baızaqov.
Aıta keteıik, Qazaqstanda májilis jáne máslıhat depýtattarynyń kezekten tys saılaýy ótip jatyr. Bıyl parlamenttik saılaý alǵash ret aralas júıe boıynsha ótedi. Májilistiń 69 depýtaty partııalyq tizim boıynsha, 29-y bir mandatty okrýgter boıynsha saılanady.
