Köktemnıŋ şuaǧyna bölengen Qaraǧandy öŋırı Nauryz meiramyn airyqşa sän-saltanatpen, keŋ tynyspen jäne şynaiy yqylaspen qarsy aluda.
Halyqtyq jäne zamanaui äuender ündesıp, şat-şadyman köŋıl küi men aqjarqyn jüzder merekenıŋ erekşe ruhyn aişyqtai tüsude. Öŋırdıŋ barlyq qala-audandarynda ūiymdastyrylǧan dumandy şaralar dästür men jaŋaşyldyqty sabaqtastyryp, ärbır tūrǧyn men qonaqty jaŋaru men üilesım merekesınıŋ ajyramas bölıgıne ainaldyrdy.
Qalalardyŋ ortalyq alaŋdarynda etnoauyldar boi köterıp, taqyryptyq kiız üiler tıgılıp, teatrlandyrylǧan qoiylymdar, aitys pen konserttık baǧdarlamalar ūsynyluda.
Barşa jerde ūlystyŋ ūly künıne tän köktemgı serpılıs pen ūlttyq ruh aiqyn sezıledı.
Merekenıŋ eŋ auqymdy alaŋdarynyŋ bırı Qaraǧandy qalasynyŋ Ortalyq mädeniet jäne demalys saiabaǧynda ūiymdastyryldy.
Mūndaǧy merekelık atmosfera kıreberısten-aq aiqyn aŋǧarylady: ūlttyq naqyştaǧy sändı arka, tularmen kömkerılgen keŋıstık — barlyǧy üilesımdı bezendırılgen.
Kaskadty alaŋ aq şaŋqan kiız üiler qonys tepken körkem etnoauylǧa ainaldy. Ūlttyq oiu-örnektermen bezendırılgen ärbır kiız üi belgılı bır taqyrypty arqau etedı — dästürlı tūrmys, qolöner, ūlttyq taǧamdar.
Mūnda qolöner şeberlerınıŋ järmeŋkesı, sauda qatarlary, art jäne foto aimaqtar,
sondai-aq köpşılık süietın altybaqan ornalasqan.
Merekenıŋ şymyldyǧy «Qoş keldıŋ, Äz-Nauryz» atty teatrlandyrylǧan qoiylymmen türıldı.
— Nauryz — jai ǧana mereke emes, būl — ruhani jaŋǧyru men ışkı tüleudıŋ kezeŋı. Ol bızge adamgerşılık pen ızgılıkke negızdelgen qarapaiym, bıraq ömırlık maŋyzdy qūndylyqtardy eske salady: üilesımde ömır süru, bır-bırımızdı qūrmetteu, eŋbektı qadırleu jäne şükırşılık etu. Eŋ bastysy — uaqytynda aialdap, ömırge jaŋaşa közqaraspen qarau. Öitkenı däl osydan özara tüsınıstık pen syilastyq bastau alady. Būl — san ǧasyrlyq dala örkenietıne tän qasiet. Halyqty ūiystyratyn osy meiramda bırlıgımız beki tüsıp, jasampaz, ozyq qoǧam qalyptassyn! Memleket basşysy Qasym-Jomart Toqaev atap ötkendei, barlyǧy ızgı oidan, jyly sözden jäne dūrys äreketten bastalady. Sonda ǧana jaŋǧyru naqty ıspen körınıs tabady, — dedı Qaraǧandy oblysynyŋ äkımı Ermaǧanbet Bölekpaev.
Merekelık şaralar konserttık baǧdarlamamen jalǧasyn tapty.
Sahnada şyǧarmaşylyq ūjymdarmen bırge belgılı öner maitalmandary — Nūrlan Önerbaev, Marjan Arapbaeva jäne «Jıgıtter» toby öner körsettı.
Körermenderge halyq änderı men zamanaui estradalyq şyǧarmalar ūsynyldy.
Jaǧalauda ornalasqan merekelık şatyr biylǧy dumannyŋ basty ortalyqtarynyŋ bırıne ainaldy.
Mūnda sändık-qoldanbaly öner tuyndylarynyŋ körmesı, oblystyq tarihi-ölketanu mūrajaiynyŋ köşpelı ekspozisiiasy ūiymdastyryldy. Sonymen qatar zamanaui tehnologiialarǧa arnalǧan alaŋda robototehnika men jasandy intellekt jobalary tanystyryldy.
Robototehnika körmesınde halyqaralyq deŋgeidegı jarystarǧa qatysyp jürgen jas daryndar öz jetıstıkterın paş ettı. Olardyŋ qatarynda halyqaralyq chempionattardyŋ bırneşe dürkın jüldegerı — «Mūrager» mektebınıŋ komandasy bar.
— Qazırgı jastardyŋ basym bölıgı baǧdarlamalau men sifrlyq tehnologiialarǧa bet būruda. Menıŋşe, elımızdıŋ bolaşaǧy däl osy baǧyttarmen tyǧyz bailanysty. Būl salalarǧa investisiia artqan saiyn, keleşegımız de nūrly bolmaq. Barşaŋyzdy Nauryz meiramymen qūttyqtaimyn! Mahabbat, baqyt jäne igılık tıleimın, — dedı komanda müşesı Damir Maǧjan.
Merekelık alaŋda balalar oiyn aimaqtary men sporttyq keŋıstıkter de jūmys ıstedı. Mūnda qazaq küresı, asyq atu, sadaq atu, arqan tartu jäne özge de ūlttyq sport türlerınen jarystar öttı.
Nauryz meiramy köptegen qonaqtyŋ basyn qosyp, olar būl şuaqty kündı jaqyndarymen bırge qarsy aldy.
Astana qalasynan kelgen Elaman Qoişybaev ta öz äserımen bölıstı.
— Bügın — erekşe kün. Barşa Qazaqstan halqyna beibıt aspan, baqyt pen bereke tıleimın. Merekenıŋ joǧary deŋgeide ūiymdastyrylǧany quantady — bärı körkem ärı şynaiy, — dedı ol.
Qala tūrǧyndary da Nauryzdy zor quanyşpen qarsy alyp, jürekjardy tılekterın jetkızude.
Nikolai Şpilchenko jūbaiy Iýliiamen jäne kışkentai qyzymen bırge kelgen.
— Barşaŋyzdy Nauryzben qūttyqtaimyz! Är şaŋyraqqa densaulyq, baqyt, beibıtşılık pen bereke tıleimız. Üilerıŋızde ärdaiym jylylyq pen quanyş ornasyn! Biyl köktemnıŋ däl osy merekemen qatar keluı erekşe äser qaldyrady — tabiǧattyŋ şynaiy jaŋaruy anyq sezıledı, — dedı jas otbasy.
— Men üşın Nauryz — jyl saiyn asyǧa kütetın mereke. Saiabaqtaǧy duman jyl ötken saiyn mazmūndy ärı qyzyqty bola tüsude. Qaraǧandylyqtar men qala qonaqtaryn osy jarqyn merekemen qūttyqtaimyn! Barşaŋyzǧa densaulyq, jaqsylyq pen baqyt tıleimın, — deidı «Süiınşı» bi ansamblınıŋ qatysuşysy Aiza Mūhanova.
Halyqtyq seruender ekı kün boiy jalǧasady.
Biyl Qaraǧandy oblysynda Nauryznama onkündıgı aiasynda ūlttyq dästür men mädeniettı saqtau jäne keŋınen nasihattauǧa baǧyttalǧan myŋnan astam ıs-şara ūiymdastyryldy.
