Qaraǧandyda qūstarǧa arnalǧan qolaily ūialar köbeidı

Qaraǧandynyŋ Ortalyq mädeniet jäne demalys saiabaǧynda qūstarǧa arnalyp jaŋa 100 ūia salyndy. Būl igı şaraǧa erıktıler men ardagerler, deputattar jäne belsendı tūrǧyndar qatysty. – Bız qazır öz qalamyz ben bükıl el boiynşa ötıp jatqan ekologiialyq aksiiany qoldauǧa şeşım qabyldadyq. Qalamyzda qūstar än aityp, şaharymyz jaily jäne ädemı bolǧanyn qalaimyz. Būl balalar tabiǧatty saqtau kerek ekenın tüsınuı üşın qajet. Qūstarǧa arnalǧan ūiaşyqtardy balalar öz qoldarymen jasady, būǧan tıptı bırınşı synyp oquşylary da qatysty. Keibıreulerıne ata-analar kömektestı, - deidı Martbek Mamraev atyndaǧy mektep-internatynyŋ biologiia pänınıŋ mūǧalımı Aijan Ospanova. № 2 liseidıŋ 5-synyp oquşysy Azaliia Qadyrova erekşe qūs ūiasyn jasapty. -  Şaŋyraq türındegı qūs ūiasyn jasadym. Ony qūstarǧa ädemı jäne jaily bolu üşın jasandy güldermen bezendırdım. Men bärın özım jasadym, anam tek qalai jaqsyraq jasau keretıgın aitty. Men qūstarǧa ūnaitynyna senımdımın, - deidı Azaliia. Qaraǧandyda qūstar men januarlar üşın qolaily orta qūrudyŋ maŋyzdylyǧyn qalalyq mäslihat deputaty Aidos Esjanov ta atap öttı. Ol sondai-aq ornatylǧan qūs ūialary tabiǧatty aialaitynymyzdyŋ belgısı ǧana emes, sonymen qatar ekologiialyq tepe-teŋdıktı saqtauǧa kömektesetın, qūstardy qalamyzǧa köptep tartuǧa jaqsy täsıl bolady degen pıkır bıldırdı. Aksiiany ūiymdastyruşylar qatarynda Qaraǧandy Jastar resurstyq ortalyǧy da bar. – Bızdıŋ aksiiaǧa 150-ge juyq adam qatysady: kışkentai balalar da, joǧary synyp oquşylary da. Maqsat - qorşaǧan ortaǧa qamqorlyq jasau. Ortalyq saiabaqta qūstarǧa yŋǧaily bolu üşın jüzge juyq qūs ūiaşyǧy ılındı, – deidı Qaraǧandy Jastar resurstyq ortalyǧynyŋ direktory Iаkub Djamalov. Qūstarǧa arnalǧan ūialar saiabaqtaǧy üşınşı köldıŋ janynda ılındı. Qalada barlyǧy 1000 qūs üiı ornatylǧan. Joba "Taza Qazaqstan" ekologiialyq aksiiasy aiasyndaǧy "Jasyl aimaq" aptalyǧynda jüzege asyrylyp otyr.