Qaraǧandyda auyr jaǧdaida köz jūmǧan büldırşınge qatysty Densaulyq saqtau ministrlıgı resmi tüsınıkteme berdı, dep habarlaidy "Adyrna".
Qaraǧandy oblysy Densaulyq saqtau basqarmasynyŋ mälımetınşe, büldırşın auru bastalǧannan keiın 2-täulıkte infeksiialyq ortalyqqa jetkızılgen. Jaǧdaiy kürt naşarlap, keiın reanimasiia jäne qarqyndy terapiia bölımşesıne auystyrylǧan. Tekseru barysynda balanyŋ aǧzasynda bakteriialyq, virustyq jäne saŋyrauqūlaq tektı qozdyrǧyştar qatar jürgen aralas infeksiia anyqtalǧan.
Därıgerlerdıŋ deregınşe, aurudyŋ auyr ötuıne aiqyn immun tapşylyǧy äser etken. Sonymen qatar balaǧa tuǧannan berı vaksina salynbaǧany anyqtalǧan, būl aǧzanyŋ infeksiiaǧa qarsy tūru qabıletın edäuır älsıretken. Sonyŋ saldarynan jürgızılgen em şaralary tolyq kölemde körsetılgenıne qaramastan, kütken nätije bermegen.
Emdeu taktikasy bırneşe ret respublikalyq deŋgeidegı konsiliumdarda qaralǧan. Oǧan ştattan tys bas balalar infeksionistı, pulmonolog jäne reanimatolog sekıldı salalyq mamandar tartylǧan. Qosymşa ädıs retınde ekstrakorporaldyq membranalyq oksigenasiia (EKMO) qoldanu mümkındıgı de talqylanǧanymen, balanyŋ jaǧdaiy men medisinalyq körsetkışterıne bailanysty būl täsıl ūsynylmaǧan.
Ministrlık mūndai jaǧdailardyŋ medisinalyq tūrǧydan asa kürdelı ekenın atap öttı. Auyr infeksiia, immun tapşylyǧy jäne vaksinasiianyŋ bolmauy qatar kelgen kezde, tıptı uaqytyly jäne tolyq jürgızılgen emnıŋ özınde qolaisyz nätije qaupı aitarlyqtai artady.
Vedomstvo atalǧan oqiǧa boiynşa körsetılgen medisinalyq kömektıŋ sapasyn obektivtı baǧalau üşın täuelsız sarapşylardy tarta otyryp, jan-jaqty tekseru jürgızetının habarlady. Sonymen qatar qoǧam men BAQ ökılderın tek resmi ärı tekserılgen aqparatqa süienuge, asyǧys qorytyndy jasamauǧa şaqyrdy.
Densaulyq saqtau ministrlıgı marqūm balanyŋ otbasy men jaqyndaryna köŋıl aitty.
