Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasy adam saýdasynyń qurbandaryna áleýmettik kómek kórsetý úshin 5 769 000 teńge qarjy bólindi, dep habarlaıdy “Adyrna” ulttyq portaly satypalu.gov.kz saıtyna silteme jasap.
Atalǵan memlekettik satyp alý 31 shilde kúni "Adam satý qurbandaryna arnaýly áleýmettik qyzmet kórsetý" degen taqyryppen jarııalanǵan. 5 769 000 teńgege baǵalanǵan tender jeńimpazy 10 tamyz kúni anyqtalady. Tehnıkalyq sıpattamada tapsyrys oryndaýshy adam saýdasynyń qurbandaryna arnaýly áleýmettik qyzmetterdi usynatyny jazylǵan. "Jobany júzege asyrý orny Qaraǵandy qalasy, iske asyrý merzimi 2023 jyldyń aqpan-jeltoqsan aılary ekeni" kórsetilgen.
Qarańyz (Mátin qaz-qalpynda berildi): "Qyzmet alýshylardyń sany 2023 jyly – 7 adam. Qarjylandyrý somasy shart jasalǵan kúnnen bastap 2023 jylǵy qarjy jylynyń 274 kúnine (9 aıyna) eseptelgen. Qajet bolǵan kezde qarjy jylynyń qalǵan kúnderin áleýetti ónim berýshi arnaýly áleýmettik qyzmetterdi óz qarajaty esebinen usynady".
Bul oraıda ózdiginen "Qaraǵandy oblysynyń jumyspen qamtýdy úılestirý jáne áleýmettik baǵdarlamalar basqarmasy jyldan shatasyp otyr ma?" degen zańdy suraq týyndaıdy. Áıtpese, ótken2023 jylǵy sharalarǵa bıyl aqsha bólýi zańǵa qaıshy emes pe? Bizdiń oıymyzsha, basqarma 2023jyly jazylǵan tehnıkalyq sıpattamany 2024 jyly ózgertpesten kóshire salǵan. Sonyń ózinde basqarma bıylǵy jyldyń qańtar-jeltoqsan aılarynyń arasynda atqarylýy tıis jumystarǵa shildeniń aıaǵynda bir-aq tender jarııalap otyr degen sóz.
Tapsyrys oryndaýshy aldaǵy tórt aıda qujattarda taıǵa tańba basqandaı kórsetilgen 274 kúndik, ıaǵnı 9 aılyq jumysty qalaı jasaıdy? Mysaly, tehnıkalyq sıpattamada tapsyrys oryndaýshy adam saýdasynyń qurbandaryna 6 aıǵa deıin ýaqytsha turýǵa baspana taýyp berýi kerektigi jazylǵan. Jeltoqsan aıyna deıin bar bolǵany 4 aıǵana merzim qaldy. Al, qujatta basqarma qaıdaǵy 274 kúndi aıtyp otyr? Bul - bir.
Ekinshiden, Qaraǵandyda 2023 jyly adam saýdasynyń qurbany bolǵan 7 adam bolǵan eken. Bıyl qansha adam bar? Tender jeńimpazy naqty qansha azamatqa áleýmettik, rýhanı, psıhologııalyq járdem kórsetetini anyq jazylmaǵan. Joq álde, byltyrǵy 7 adam bıyl da kómekke májbúr me?
Úshinshiden, jyl boıy atqarylýy kerek jobaǵa ne sebepti sońǵy tórt aı qalǵanda tender jarııalanady? Tenderdi utyp alǵan kompanııa 274 kúnniń esebin qalaı tapsyrmaq?
Bul suraqtardy atalmysh basqarmaǵa joldadyq. Olardan jetken jaýapty da jarııalaıtyn bolamyz!
Aqan Asyl
“Adyrna” ulttyq portaly
