Qaraǧandy oblysyndaǧy ırı önerkäsıp käsıporyndarynyŋ ūjymdary Qazaqstan Respublikasynyŋ jaŋa Konstitusiiasy jobasyn qoldady. Metallurgiia, kömır salasy jäne qaita öŋdeu öndırısterınıŋ qyzmetkerlerı ūsynylyp otyrǧan özgerısterdıŋ eŋbek adamynyŋ qūqyqtaryn qorǧau men ekonomikanyŋ ornyqty damuy üşın maŋyzyn atap ötude.
Qarmet kompaniiasynyŋ otyz bes myŋdyq ūjymy Negızgı zaŋdy jaŋartu adamdar üşın tüsınıktı ärı maŋyzdy qaǧidattardy — adamnyŋ basymdyǧyn, onyŋ qadır-qasietıne qūrmettı, eŋbek etu qūqyǧyn jäne käsıbi ösu mümkındıkterın — bekıtedı dep sanaidy. Käsıporynda aiqyn ärı teŋ qaǧidalardyŋ tek azamattar üşın ǧana emes, önerkäsıptıŋ tūraqty jūmys ısteuı üşın de maŋyzdy ekenı aityldy.
— Jaŋa Konstitusiia — el bolaşaǧynyŋ berık ırgetasy. Onyŋ negızınde ädılettılık, zaŋdylyq jäne adamǧa qūrmet qaǧidattary jatyr. Eŋbek adamdary üşın memleket barşaǧa tüsınıktı ärı teŋ erejelerdı qamtamasyz etıp, azamattardyŋ qūqyqtaryn qorǧap, damu üşın jaǧdai jasauy asa maŋyzdy. Däl osyndai qaǧidattar negızınde quatty, ornyqty jäne ädılettı memleket qūrylady, — dedı direktorlar keŋesınıŋ töraǧasy Andrei Lavrentev.
Jobany «Şūbarköl kömır» AQ qyzmetkerlerı de qoldady. Eldegı energetikalyq kömırdıŋ ırı öndıruşılerı sanalatyn būl ūjymda qūjatta adamnyŋ ömırı, qadır-qasietı jäne eŋbegın qorǧau basymdyǧynyŋ bekıtıluı önerkäsıp sektory qyzmetkerlerı üşın qaǧidatty mänge ie ekenı atap ötıldı.
— Bügın el jaŋa Konstitusiiany qabyldau jönınde maŋyzdy şeşım aldynda tūr. Eŋbek ūjymy üşın būl jai ǧana zaŋdyq qūjat emes — būl ömır men damudyŋ, qūqyqtar men bostandyqtardyŋ kepılı. Konstitusiiada adam, onyŋ ömırı men qadır-qasietı memlekettıŋ eŋ joǧary qūndylyǧy ekenı bekıtılgen. Būl eŋbektıŋ qauıpsızdıgı — formaldylyq emes, mındet ekenın; qyzmetker qūqyǧyn qorǧau — ötınış emes, zaŋ ekenın bıldıredı, — dedı ERG kömır divizionynyŋ bas operasiialyq direktory, Şūbarköl kömır AQ ökılı Sergei Kim.
Qaraǧandy ferroqorytpa zauyty Asia FerroAlloys aksionerlerı men ūjymy da öz ūstanymdaryn bıldırdı. Käsıporynda önerkäsıp sektory üşın äleumettık tūraqtylyq pen qauıpsız eŋbek jaǧdailaryna qatysty normalardyŋ airyqşa maŋyzdy ekenı atap ötıldı. Olardyŋ pıkırınşe, Negızgı zaŋdy jaŋartu eŋbek adamyna arnalǧan kepıldıkter jüiesın anaǧūrlym tüsınıktı ärı naqty etedı.
Jaŋa Konstitusiia jobasyn qoldaitynyn MAKER KLMZ JŞS qyzmetkerlerı de mälımdedı.
— Bügın ärbır azamattyŋ belsendı azamattyq ūstanym tanytuy maŋyzdy. Referendum — el bolaşaǧyna öz ülesın qosuǧa, tūraqtylyq pen progrestı qoldauǧa mümkındık, — dep sanaidy käsıporyn ūjymy.
Önerkäsıp sektorynyŋ qyzmetkerlerı referendumǧa qatysatynyn atap öttı, öitkenı būl — olardyŋ azamattyq paryzy ärı el bolaşaǧyna yqpal etu mümkındıgı.
