2024 jyldyŋ basynan berı elımızde 320 orman örtı tırkeldı, dep habarlaidy "Adyrna" ūlttyq portaly Qazaqparatqa sıltep.
Būl turaly Orman şaruaşylyǧy jäne januarlar düniesı komitetınıŋ bas sarapşysy Rinat Nūrǧazin habarlaǧan.
Mamannyŋ aituynşa, orman örtterınıŋ basym bölıgı — naizaǧaidyŋ saldarynan, al bıraz bölıgı — adam äreketınen şyqqan.
«Ört qaupı bes deŋgeige bölınedı. Eŋ joǧarǧysy – besınşı synyp. Būl, negızınen, jaz mezgılınde, aptap ystyqta tırkeledı. Biylǧy 320 örttıŋ 217-sı naizaǧaidyŋ äserınen şyqqan. Naizaǧai qūrǧaq şöpke tüsken kezde bırneşe minutta ört tūtanyp, ülken orman örtıne ūlasuy mümkın», – dedı sarapşy.
Sonymen qatar, adam faktorynan şyqqan 12 orman örtı de anyqtalǧan. Köbınese būl — temekı tūqylyn, şyny bötelke nemese janǧyş zattardy tastap ketudıŋ saldary.
«Qazırgı taŋda osyndai qūqyqbūzuşylyqtarǧa 52 mln teŋge kölemınde aiyppūl salyndy. Onyŋ 12 milliony öndırılıp alyndy, al keibır ıster sotqa joldandy», – dedı Rinat Nūrǧazin.
Komitet ökılı ärbır orman örtı boiynşa qyzmettık tekserıs jürgızıletının atap öttı. Sebepter arnaiy komissiia arqyly anyqtalyp, qajet jaǧdaida qylmystyq ıs qozǧalady.
Sonymen qatar, ekologiia ministrlıgı men jergılıktı äkımdıkter orman şaruaşylyqtaryn qorǧauǧa arnalǧan 2024–2027 jyldarǧa arnalǧan keşendı jospardy qabyldaǧan. Būl jospar aiasynda 68 milliard teŋge bölınıp, tehnikalyq jabdyqtarmen qamtu közdelıp otyr.
Alaida sarapşynyŋ aituynşa, ormandy saqtau tek memlekettık qūrylymdardyŋ emes, är azamattyŋ da ortaq jauapkerşılıgıne bailanysty.
«Är adam ormanda özın dūrys ūstaudy, balalaryn soǧan üiretudı, ot jaqqan soŋ mındettı türde söndırudı, janǧyş zat qaldyrmaudy bıluı kerek», – dep atap öttı Nūrǧazin.
Qazır ormandy jerlerge keletın turisterdıŋ sany artyp keledı. Būl jaǧdai ört qauıpsızdıgıne bailanysty mäselelerdı kürdelendırıp otyr. Osyǧan bailanysty orman qyzmetkerlerı tüsındıru jūmystaryn jürgızıp, profilaktikalyq därıster oqyp, habarlamalar taratuda.
