Qala künıne orai 12 qyrküiek künı Oral qalasynda jastarǧa arnalǧan eŋ auqymdy jobalardyŋ bırı – «ORAL JASTARY FEST – 2025» festivalı öttı.
Şara biylǧy Jūmysşy mamandyqtar jyly aiasynda ūiymdastyrylyp, jastardyŋ käsıbilıgın, şyǧarmaşylyq qabıletın jäne eŋbekke degen qūlşynysyn arttyruǧa baǧyttaldy.
Festival Oral qalasynyŋ ışkı saiasat bölımınıŋ tapsyrysymen «İntegral» jastar qoǧamdyq bırlestıgı jäne qalalyq jastar resurstyq ortalyǧynyŋ ūiymdastyruymen öttı. Şaraǧa qalalyq mädeniet jäne tılderdı damytu bölımı qoldau körsettı.
Festivaldıŋ basty maqsaty – jūmysşy mamandyqtardyŋ märtebesın köteru, jastardyŋ şyǧarmaşylyq äleuetın damytu, olardy qoǧamdyq ömırge belsendı aralastyru jäne tuǧan qalasyna degen süiıspenşılıgın arttyru.
Oral qalasynyŋ Tūŋǧyş Prezident alaŋynda ötken festivalge 10 myŋnan astam jas qatysty. Şara aiasynda tört joǧary oqu orny men 20 arnauly bılım beru mekemesınıŋ studentterı mamandyq körmesıne qatysyp, öz önerı men jobalaryn tanystyrdy. Körmenı qala äkımı Mūrat Baimenov jäne «AMANAT» partiiasynyŋ Batys Qazaqstan oblystyq filialynyŋ atqaruşy hatşysy Azamat Safimaliev arnaiy kelıp tamaşalady.
Festival aiasynda jetı baǧyt boiynşa baiqaular ūiymdastyryldy. Atap aitqanda, käsıbi şaştarazdar arasynda «Barber Battle», dänekerleuşılerdıŋ sport alaŋdaryn qalpyna keltıru boiynşa «Şeber dänekerşı» baiqauy, qalanyŋ kelbetın tort arqyly beineleitın konditerlık saiys jäne sän körsetılımderı men erekşelengen tıgınşıler baiqauy öttı. Sonymen qatar, studentterge arnalǧan «Mamandyǧym – maqtanyşym» körmesı, «Aşyq mikrofon» şyǧarmaşylyq alaŋy jäne festival şaralaryn beinekontent arqyly körsetken mobilograftar saiysy ūiymdastyryldy.
Atalǧan atalymdar boiynşa qatysuşylararnaiy jüldelermen marapattaldy. Baiqaularǧa 35-ten astam mekeme qoldau körsetıp, belsendılık tanytty. 12 qyrküiek künı saǧat 18:00-de qala tūrǧyndary men qonaqtaryna konditerlık jäne tıgınşılık baiqaulary aiasynda daiyndalǧan jūmystar ūsynylyp, körmeler ūiymdastyryldy. Festivaldıŋ qorytyndy bölıgı – saǧat 19:00-de bastalǧan Gala-konsert boldy.
Merekelık keşke Qazaqstan estradasynyŋ tanymal änşılerı Qanay, Alina jäne Rafa qatysty. Sonymen qatar sahnada jergılıktı önerpazdar – Raketa, Raiymbek Ötepov jäne özge de şyǧarmaşyl jastar öner körsettı. Konsert barysynda är nominasiia jeŋımpazdary sahnada marapattaldy.
Festival turaly Oral qalalyq jastar resurstyq ortalyǧynyŋ basşysy Dulat Jüsıpqaliev öz pıkırın bıldırdı:
– Oral qalasynda 14 pen 35 jas aralyǧynda 100 myŋnan astam jas bar. Būl – bızdıŋ qalamyzdyŋ eŋ ülken äleuetı ärı bolaşaǧy. Memleket basşysy jariialaǧan Jūmysşy mamandyqtar jyly aiasynda ötken būl festival – jastardyŋ käsıbi damuyna serpın beretın naqtyıs-şara. Maqsatymyz – jastardyŋ eŋbekke degen qyzyǧuşylyǧyn oiatu, käsıbi daǧdylaryn arttyru jäne olardyŋ qoǧamdaǧy ornyn aiqyndau, – dedı Dulat Nūrbergenūly.
«Oral Jastary Fest – 2025» – būl jastardyŋ käsıbilıgın, önerın jäne azamattyq belsendılıgın bırıktıretın alaŋ ǧana emes, sonymen qatar tuǧan qalasynyŋ damuyna üles qosuǧa mümkındık beretın maŋyzdy joba.
Festival jastarǧa şabyt syilap, qalalyq merekenıŋ şyraiyn aşa tüstı.
