Oral qalasynda eresekter, jastar jäne iuniorlar arasynda sadaq atudan Qazaqstan Respublikasynyŋ chempionatynyŋ saltanatty aşylu räsımı öttı. 26 şılde men 1 tamyz aralyǧynda ūiymdastyrylyp jatqan el bırınşılıgıne Qazaqstannyŋ tükpır-tükpırınen kelgen üzdık sadaqşylar qatysuda.
Bairaqty bäsekede Astana, Almaty, Şymkent qalalary men Aqmola, Almaty, Jetısu, Pavlodar, Türkıstan, Qaraǧandy jäne Batys Qazaqstan oblystarynan kelgen 260 sportşy özara myqtyny anyqtaidy.
Chempionattyŋ basty maqsaty – sportşylardyŋ şeberlık deŋgeiın arttyru, halyqaralyq arenada el namysyn qorǧaityn üzdık mergenderdı anyqtau jäne Aziia oiyndary, älem jäne Aziia chempionattary, Älem kubogı kezeŋderı men Olimpiada oiyndaryna qatysatyn Qazaqstan Respublikasy ūlttyq qūramasyna ümıtkerlerdı ırıkteu.
Saltanatty aşylu räsımıne Batys Qazaqstan oblysy dene şynyqtyru jäne sport basqarmasynyŋ basşysy Baqdäulet Säbitov, Qazaqstan Respublikasy Ūlttyq sadaq atu federasiiasynyŋ prezidentı Azamat Üsımbekov jäne Batys Qazaqstan oblysy sadaq atu federasiiasynyŋ prezidentı Nūrlan Aqnūrov qatysty.
Qūrmettı qonaqtar sportşylarǧa sättılık tılep, chempionattyŋ joǧary deŋgeide ötetınıne senım bıldırdı. Sonymen qatar, sadaq atu sportyn damytuǧa üles qosqan bırqatar azamattar marapattaldy.
Aşylu saltanaty öŋır önerpazdarynyŋ konserttık baǧdarlamasymen ärlenıp, merekelık otşaşumen aiaqtaldy. Keştıŋ erekşe sätı – sadaqşylardyŋ türlı tüstı jebelermen körsetken äserlı qoiylymy körermenderdıŋ zor yqylasyna bölendı.
Chempionat bırneşe kün boiy jalǧasyp, elımızdıŋ üzdık mergenderı chempiondyq ataq pen Qazaqstan Respublikasy ūlttyq qūramasyna joldama üşın baq synaidy.
Chempionat baǧdarlamasy
28 şılde – Kvalifikasiialyq jarystar (09:00–18:00)
29 şılde – Barlyq sanattar boiynşa finalǧa deiıngı komandalyq jarystar (09:00–16:00)
30 şılde – Olimpiadalyq ainalym (jekelei saiys) (09:00–17:00)
31 şılde – Barlyq sanattar boiynşa finaldyq jarystar (09:00–18:00)
Chempionat qorytyndysy boiynşa jeŋımpazdar anyqtalyp, halyqaralyq jarystarǧa qatysatyn ūlttyq qūramanyŋ rezervı jasaqtalady.
