Jalǵyz tal jaýqazyn

2568
Adyrna.kz Telegram

Bul sıýjetke bergisiz syrly sýretti qyzylordalyq fototilshi Bolat Omarálıev jetpisinshi jyldarda túsiripti. Eldi eleń etkizgen shubartaýlyqtardyń áıgili bastamasynyń tórtkúl dúnıeni túgel jaılap turǵan kezi. Mektep bitirýshiler jappaı aýylda qalyp, komsomol-jastar brıgadasyn quryp, shetinen qoı baǵýǵa attanyp jatty. Teginde, keńes dáýirindegi bastamanyń birazy osylaı dúrildep bastalatyn da, kóp uzamaı aıaǵy suıyla beretin. Ádepkide eńbekti ekpindetip áketken belsendi brıgadalardyń qatary kóp uzamaı seldireı túsetin. Biraq báribir bul bastamany jappaı qoldaý shart.

Ýaqyttyń talaby solaı. Sondaı bir kezeńde Syr boıyndaǵy Shıeli óńirinde «Jaýqazyn» degen komsomol-jastar brıgadasy óz aldyna otaý tigedi. Oblystyq basylymnyń basshylary Shıelide jaıqalǵan «Jaýqazynnyń» jaı-kúıin bilip, sýretke túsirip kelýge qol-aıaǵy jeńil fototilshi Bolat Omarálıevti jumsaıdy. Oralhannyń «Qasqyr ulyǵan tún» degen áńgimesindegi zamanymyzdyń sáýletti selosy týraly maqala jazýǵa tapsyrma alǵan gazet tilshisi sekildi Bókeń salyp uryp jetip kelse, el bolyp maqtap júrgen «Jaýqazynymyz» baıaǵyda sabaǵy qýrap, tamyry solyp qalypty. Berekesizdik jaılaǵan brıgada quramyndaǵy otyzǵa tarta qyz-jigit birtindep qashyp-pysyp, túgelge jýyq qarasyn batyrypty da, jalǵyz-aq osy qyz ketpeı qoıypty. Ne shynymen eńbekten jerimegen, ne namysy jibermegen... Áıteýir óz ómirine yrza deıdi. «Otyzdan – ózim, Kórdi ǵoı kózim, Jalǵyzdyq kórer jaıym joq», – dep, Abaı atasynyń izimen óleńdetip júrgen kórinedi.

Árıne, meniń aqkóńil Bolat aǵamnyń qandaı jaǵdaı basyna tússe de, Oraǵańnyń keıipkeri sekildi tapsyrmany oryndamaı, qur qol qaıtyp kelgen jeri joq. Esesine, tutas ómir shyndyǵynyń ay-tuysyn aralastyryp otyryp, tarıhqa tańbalap beredi ol. Bul joly da sóıtti.

Kánigi kózmergen ońtaıly sátti ańdyp júrip, jurtta qalǵan jalǵyz tal «jaýqazyndy» fotomyltyǵynyń qaraýylyna iliktiredi. Sol qadirli kadr, mine, osy... Osylaı endi, shyrt etkizgeni shedevr...

Jalpy, sýret-pýret bolmasa, qyz-pyzben sharýasy joq Bolat aǵam sol boıjetkenniń keıingi taǵdyry qalaı óristegenin múlde bilmeıdi. Tipti onyń atyn da, zatyn da esinde saqtamaǵan. Eh, Bóke... Sóıtýge bola ma endi?! Jaraıdy, bopty... Shynynda da, jetpisinshi jyldarda qyrdyń sáni bolǵan Shıeliniń sol bir jalǵyz tal jaýqazyny qaıda eken qazir? Japyraǵyn jaıyp, kógerip-kóktep, ósip-ónip, baıaǵyda-aq gúlbaqshaǵa aınalǵan shyǵar...

Qaıdasyń, sáıgúlik mingen sulý? Barsyń ba jer betinde? «Sen qalǵan otyz uldan ediń Záýresh», – degendeı, bir kezde jaılaýda jalǵyz jortqan qaıtpas qaısar ájelerińniń derek-dáıegin nege izdemeısińder-eı, bar bolǵyr nemereler? Ne kórindi senderge? Al, kettik... Izdeý salaıyq! Amanbysyń, atty arý?

Pikirler