جالعىز تال جاۋقازىن

2563
Adyrna.kz Telegram

بۇل سيۋجەتكە بەرگىسىز سىرلى سۋرەتتى قىزىلوردالىق ءفوتوتىلشى بولات وماراليەۆ جەتپىسىنشى جىلداردا ءتۇسىرىپتى. ەلدى ەلەڭ ەتكىزگەن شۇبارتاۋلىقتاردىڭ ايگىلى باستاماسىنىڭ تورتكۇل دۇنيەنى تۇگەل جايلاپ تۇرعان كەزى. مەكتەپ بىتىرۋشىلەر جاپپاي اۋىلدا قالىپ، كومسومول-جاستار بريگاداسىن قۇرىپ، شەتىنەن قوي باعۋعا اتتانىپ جاتتى. تەگىندە، كەڭەس داۋىرىندەگى باستامانىڭ ءبىرازى وسىلاي دۇرىلدەپ باستالاتىن دا، كوپ ۇزاماي اياعى سۇيىلا بەرەتىن. ادەپكىدە ەڭبەكتى ەكپىندەتىپ اكەتكەن بەلسەندى بريگادالاردىڭ قاتارى كوپ ۇزاماي سەلدىرەي تۇسەتىن. بىراق ءبارىبىر بۇل باستامانى جاپپاي قولداۋ شارت.

ۋاقىتتىڭ تالابى سولاي. سونداي ءبىر كەزەڭدە سىر بويىنداعى شيەلى وڭىرىندە «جاۋقازىن» دەگەن كومسومول-جاستار بريگاداسى ءوز الدىنا وتاۋ تىگەدى. وبلىستىق باسىلىمنىڭ باسشىلارى شيەلىدە جايقالعان «جاۋقازىننىڭ» جاي-كۇيىن ءبىلىپ، سۋرەتكە ءتۇسىرىپ كەلۋگە قول-اياعى جەڭىل ءفوتوتىلشى بولات وماراليەۆتى جۇمسايدى. ورالحاننىڭ «قاسقىر ۇلىعان ءتۇن» دەگەن اڭگىمەسىندەگى زامانىمىزدىڭ ساۋلەتتى سەلوسى تۋرالى ماقالا جازۋعا تاپسىرما العان گازەت ءتىلشىسى سەكىلدى بوكەڭ سالىپ ۇرىپ جەتىپ كەلسە، ەل بولىپ ماقتاپ جۇرگەن «جاۋقازىنىمىز» باياعىدا ساباعى قۋراپ، تامىرى سولىپ قالىپتى. بەرەكەسىزدىك جايلاعان بريگادا قۇرامىنداعى وتىزعا تارتا قىز-جىگىت بىرتىندەپ قاشىپ-پىسىپ، تۇگەلگە جۋىق قاراسىن باتىرىپتى دا، جالعىز-اق وسى قىز كەتپەي قويىپتى. نە شىنىمەن ەڭبەكتەن جەرىمەگەن، نە نامىسى جىبەرمەگەن... ايتەۋىر ءوز ومىرىنە ىرزا دەيدى. «وتىزدان – ءوزىم، كوردى عوي كوزىم، جالعىزدىق كورەر جايىم جوق»، – دەپ، اباي اتاسىنىڭ ىزىمەن ولەڭدەتىپ جۇرگەن كورىنەدى.

ارينە، مەنىڭ اقكوڭىل بولات اعامنىڭ قانداي جاعداي باسىنا تۇسسە دە، وراعاڭنىڭ كەيىپكەرى سەكىلدى تاپسىرمانى ورىنداماي، قۇر قول قايتىپ كەلگەن جەرى جوق. ەسەسىنە، تۇتاس ءومىر شىندىعىنىڭ اششى-تۇششىسىن ارالاستىرىپ وتىرىپ، تاريحقا تاڭبالاپ بەرەدى ول. بۇل جولى دا ءسويتتى.

كانىگى كوزمەرگەن وڭتايلى ءساتتى اڭدىپ ءجۇرىپ، جۇرتتا قالعان جالعىز تال «جاۋقازىندى» فوتومىلتىعىنىڭ قاراۋىلىنا ىلىكتىرەدى. سول قادىرلى كادر، مىنە، وسى... وسىلاي ەندى، شىرت ەتكىزگەنى شەدەۆر...

جالپى، سۋرەت-پۋرەت بولماسا، قىز-پىزبەن شارۋاسى جوق بولات اعام سول بويجەتكەننىڭ كەيىنگى تاعدىرى قالاي ورىستەگەنىن مۇلدە بىلمەيدى. ءتىپتى ونىڭ اتىن دا، زاتىن دا ەسىندە ساقتاماعان. ەح، بوكە... سويتۋگە بولا ما ەندى؟! جارايدى، بوپتى... شىنىندا دا، جەتپىسىنشى جىلداردا قىردىڭ ءسانى بولعان شيەلىنىڭ سول ءبىر جالعىز تال جاۋقازىنى قايدا ەكەن قازىر؟ جاپىراعىن جايىپ، كوگەرىپ-كوكتەپ، ءوسىپ-ءونىپ، باياعىدا-اق گۇلباقشاعا اينالعان شىعار...

قايداسىڭ، سايگۇلىك مىنگەن سۇلۋ؟ بارسىڭ با جەر بەتىندە؟ «سەن قالعان وتىز ۇلدان ەدىڭ زاۋرەش»، – دەگەندەي، ءبىر كەزدە جايلاۋدا جالعىز جورتقان قايتپاس قايسار اجەلەرىڭنىڭ دەرەك-دايەگىن نەگە ىزدەمەيسىڭدەر-ەي، بار بولعىر نەمەرەلەر؟ نە كورىندى سەندەرگە؟ ال، كەتتىك... ىزدەۋ سالايىق! امانبىسىڭ، اتتى ارۋ؟

پىكىرلەر