Aldymen "Jalǵyz tal jaýqazyn", sodan soń "Jaılaýda jaıqalǵan jaýqazyn" degen eki maqala jazdyq. Alǵashqysynda osydan qyryq tórt jyl buryn qyzylordalyq talantty fototilshi Bolat Omarálıev túsirgen áserli sýrettegi sáıgúlik mingen sulýǵa izdeý saldyq. Ekinshisinde atqa mingen arýdyń Qyzylordanyń irgesinen tabylǵanyn aıttyq. Bizdiń ótinishimiz boıynsha "Syr boıy" gazetiniń jaýapty hatshysy Dáýirjan Elýbaev pen fototilshi Nurbolat Nurjaýbaı arnaıy baryp áńgimelesip, keıipkerdi sýretke túsirip, qazirgi keıpin kórsetti. Endi búgin Syr boıyna jol tústi. Arnaıy kelgen negizgi sharýamyzdy rettegen soń, bir kezdegi jalǵyz tal jaýqazynmen jolyǵýdy jón sanadyq. Syrqattanyp jatqan Bolat aǵa bara almady. Sondyqtan Dáýirjan men Nurbolatty qasyma ertip aldym. Ol ekeýi bularmen keshe ǵana tanyssa da, qyryq jyldan beri sol úıde júrgen adam sekildi aıaqtaryn alshań basady.
Jalǵyz tal jaýqazyn jaıqalyp, gúl-baqshaǵa aınalypty. Ózi sózge sheshen, oıyńa kele bermeıtin tirkesterdi túıdektetip túsiredi. Bizdiń kelgenimizdi estigen aǵaıyn-týystary túgel jınaldy. Ózderi tutas bir kósheni túgel jaılap jatyr eken. Jalǵyz Úrláı ǵana emes, aǵaıyndarynyń bári shetinen qara sózge aǵyp tur. Áýlettiń úlkeni sanalatyn bir ájeıge áńgime bolsyn dep, "Apa, qanshaǵa keldińiz?", - deı salyp edim, myrs etti de, "Qaraǵym, qyzdyń jasyn suramaıdy", - dep qaıyryp tastady sypaıy ǵana. Tilimdi tistep ala jazdadym. Jyrpyldap nem bar edi... Ómirimde sózden jeńilgenim. Ońbaı tústim. Sony sezgendeı, "Qaljyń ǵoı shyraǵym, seksen ekige endi ǵana keldim", - dep, taǵy da bir qaǵyp jiberip, qalpaqtaı ushyrdy. Berekesi kelisken, sózdiń qadirin biletin, ázildi ornymen aıta biletin, ósip-óngen, jańaryp-jetilgen áýlet eken. Úrlaıda es joq. "Meni baýyrlarym izdep keldi", - dep, tynbaı shapqylap júr. Arasynda kóziniń jasyn syǵyp alady...
Mine, bir sýrettiń tarıhy. Ony ári qaraı tolyqtyryp, túgeldep, maıyn tamyzyp, qara sózben jyrlaý bizdiń Dáýirjanǵa júkteldi... O, endi onyń jazýy bólek... Tiliniń maıyn tamyzady. Qara sózden quıyn turǵyzady...
Qaıtyp baramyz... Shýaqty shańyraq oıymyzdan keter emes. Sulýlyq ta, jylylyq ta osy úıdiń tórine kelip qonaqtaǵan sekildi...
Aman júr, atty arý!
Baýyrjan OMARULY
