24 mamyr – M.Áýezov atyndaǵy Qazaq memlekettik akademııalyq drama teatrynyń mýzeıiniń qurylǵan kúni. Teatr mýzeıine 50 jyl tolyp otyr.
Osy aıtýly dataǵa oraı «Teatr mýzeıiniń týni» ótedi. Kelińizder, mýzeı túnin birge tamashalaıyq! Mýzeı – halyqtyń tarıhı tanymynyń shejiresi, túrli oqıǵalar men kezeńderdiń, umytýǵa bolmaıtyn sátterdiń kýágeri. Mundaǵy ár zattyń ózindik tarıhy bar. M.Áýezov teatrynyń mýzeıi jarty ǵasyr ýaqyt ishinde óziniń jádigerlerin tolyqtyrýdan bólek, halyqty teatrdyń ótkenimen tanystyratyn, aıaýly da ardaqty akterlerdiń ómirnamasynyń el bile bermeıtin betterin jınaqtap, kórermenge jetkizetin aıryqsha bedelge ıe bola bildi.
Mýzeıdiń ashylý tarıhy týraly aıtqanda, belgili akter, Halyq ártisi Qapan Badyrovtyń «Esten ketpes esimder» atty kitabyndaǵy «Tarıh qoımasy» atty maqalasyndaǵy myna joldar oıǵa oralady: «Alǵashqy ashylǵan teatrdy zor qýanyshpen qarsy alǵan qazaq eli sonsha kóp syılyqtar tartty. Kilem, túskıiz, qasqyr ishik, túlki ishik, túlki tymaq, túıe jún shekpen, qundyz bórik, jibek shapan, kúmis er toqym, syrly aıaq, kúmis ojaý, aǵash shara, sary tostaǵandar, dastarqandar, asha baqan, kúmis kise, jibek belbeý, ártúrli órilgen qamshy teatr qurmetine tartylǵan-dy. Al, qyzdar kıer úkili taqııa, kámshat bórik, sáýkele, oqaly shapan, kesteli kóılek, omyraýyna túrli teńge taqqan kamzol, syldyraǵan sholpy, bilezik, baldaqtardyń talaıy syıǵa kelgenin bilemiz», – dep jaza kele, sonyń báriniń qadirine jete bilmegendikterine ókinish bildiredi. Sebebi, halyq syıǵa tartqan osynshama mura-jádigerler mýzeı bolmaǵandyqtan tozyp, iske alǵysyz dúnıege aınalǵan.
Eger 1926 jyldan bergi barlyq eksponattar saqtalǵan bolsa, kórermenge tartý eter qundy dúnıe tipten mol bolar edi. Búginde mýzeı qory Qazaqstandaǵy ózge teatrlardan kósh ilgeri, mundaǵy zattardyń san alýandyǵy, tarıhı quny asa joǵary baǵaly dúnıelerdiń moldyǵy kóńilge medeý. Sol jyldary Qapan Badyrov, Nurmuhan Jantórın, Sábıra Maıqanova, Sháken Aımanov, Hadısha Bókeeva, Sholpan Jandarbekova, Asanáli Áshimov, Esmuqan Obaev, Áýbákir Rahımov bastaǵan aǵa-apalarymyz bar kúshin salyp, jádigerlerdiń jınaqtalýyna, kóbeıýine, olardyń hronologııalyq tártippen rettelýine zor úles qosqan. Eger, kimde-kim teatr mýzeıin kelip kórse, 92-jyldyq tarıhy bar qarashańyraqtyń tarıhymen kezeń-kezeńimen tanysa alady. Elimizge belgili teatr metrleriniń 30-dan astam maıly boıaýmen salynǵan portretteri qaz-qatar tizilip, ilinip tur. Akterlerdiń ár jyldary, ártúrli qoıylymdarda kıgen kastıýmderin bizdiń baǵa jetpes baılyǵymyz desek te bolady. Mýzeı jumys istegennen bergi zerli, asyl matadan tigilgen kıim úlgiler bar. Budan bólek, ártisterdiń medaldary, marapattary, alǵys hattary, qoldanǵan buıymdary saqtaýly. Ár spektaklden túsirilgen fotolardyń qory tipten mol. Fotolar murasyna úńilgen kezde, sonaý teatr qurylǵan jyldardan bastap, kúni búginge deıingi kezeńdi qamtıtyn, rejısserler, akterler, basshylar, tehnıkalyq qyzmetkerler, basqa da teatrǵa qatysty beınelerge jolyǵasyz. Olardyń shaǵyn ómirbaıany, ár jyldarda qoıylǵan spektaklderdegi rólderi, san salaly buqaralyq aqparat quraldaryna bergen suhbattary men olar jaıly jazylǵan aqparattar, maqalalar, zertteýler, esseler men ocherkter, sahna jáne gastroldegi, túrli mádenı sharalar tusyndaǵy sýretteri, dramatýrgterdiń sahnalanǵan jáne teatrdyń kórkemdik keńesine usynǵan pesalary, t.b. jınaqtalǵan. Belgili akterlerdiń ózi tutynǵan zattary, áshekeı buıymdary, keıbir kúndelikteri men qoljazbalary, tilekteri de tabylady.
Bastalýy saǵat 20.30
Ótetin orny – M. Áýezov drama teatry
M.Áýezov atyndaǵy Qazaq memlekettik
akademııalyq drama teatrynyń mýzeı bólimi
