«Azamattarǧa arnalǧan ükımet» korporasiiasy memlekettık qyzmetterdıŋ basym bölıgın qaǧazsyz qyzmetke auystyrmaq. Ol üşın halyqqa qyzmet körsetu ortalyqtarynda 8 qyzmet boiynşa qaǧaz türınde berıletın qolhatty qysqartty, dep habarlaidy «Adyrna» tılşısı.
Jaqyn arada barlyq memlekettık qyzmet qolhatsyz körsetıletın bolady.
"Azamattarǧa arnalǧan ükımet" memlekettık korporasiiasynyŋ Basqarma töraǧasy Süienış Äbdıldinnıŋ aituynşa, qaǧazsyz qyzmet körsetuge köşu bırneşe kezeŋmen jüzege asyrylady.
"Memlekettık apparatty jalpy sifrlandyru jäne biurokratiiasyzdandyru aiasynda milliondaǧan tonna qaǧazdy tehnologiialar men onlain-servisterge auystyru qajet, bız osy baǧytta jūmysty bastap ta kettık. Endı qazaqstandyqtarǧa qūjaty daiyn bolǧanda qai HQO-ǧa jügınu kerektıgı jäne uaqyty körsetılgen sms-habarlama keledı. HQO operatoryna klient qolhattyŋ elektrondy nūsqasyn körsetse boldy", - deidı Äbdıldin.Halyqqa qyzmet körsetu ortalyqtarynyŋ mamandary qazaqstandyqtarǧa osy 8 qyzmet boiynşa jylyna 6 mln-ǧa juyq qolhat beredı (būl qolhattardyŋ jalpy sanynyŋ 40%-yn qūraidy). Endı klientter qūjattaryn alu kezınde qaǧaz türındegı qolhatty körsetu qajettılıgınen qūtyldy. Qaǧazdyŋ 2022 jyly kürt qymbattap ketkenın eskeretın bolsaq, qaǧaz türındegı qolhattan bas tartu memlekettık korporasiianyŋ qaǧazǧa jūmsalatyn şyǧyndaryn qysqartuǧa mümkındık beredı. Biudjettı oŋtailandyru maqsatynda Azamattarǧa arnalǧan ükımet jartylai aǧartylǧan selliulozadan jasalǧan eko-qaǧazdy paidalanuǧa köşu turaly şeşım qabyldady. Ol ädettegı qoldanatyn qaǧaz tüsınen sarǧyş bolǧanymen, basylǧan mätınnıŋ sapasyna äser etpeidı. Sonymen qatar, ol kez-kelgen printer men köşıru qūrylǧysyna jaramdy. Qazırgı uaqytta memlekettık organdardyŋ, universitetter men bankterdıŋ köpşılıgı osyndai eko-qaǧazdy paidalanuǧa köştı. Qolhat berılmeitın qyzmetter tızımı: 1. Qazaqstan Respublikasynyŋ Ūlttyq kuälandyruşy ortalyǧynyŋ tırkeu kuälıgın beru jäne kerı qaitaryp alu; 2. Qazaqstan Respublikasy halqyn tūrǧylyqty jerı boiynşa tırkeu; 3. Qazaqstan Respublikasy halqyn tūrǧylyqty jerı boiynşa tırkeuden şyǧaru; 4. Azamattyq hal aktılerın tırkeu turaly qaitalama kuälıkter nemese anyqtamalar beru; 5. Sottylyqtyŋ boluy nemese bolmauy turaly anyqtama beru; 6. Jyljymaityn mülıkke qūqyq belgıleitın qūjattyŋ telnūsqasyn beru; 7. Jyljymaityn mülık obektılerınıŋ josparyn (shemasyn) qosa alǧanda, tırkeu organy kuälandyrǧan tırkeu ısı qūjattarynyŋ köşırmelerın beru; 8. Jyljymaityn mülık obektılerınıŋ tehnikalyq pasportynyŋ telnūsqasyn beru.
«Adyrna» ūlttyq portaly
