Qazaqstanda bügın, 6 mamyrdan bastap jol erejesıne qosylǧan özgerıster küşıne endı, dep habarlaidy “Adyrna” ūlttyq portaly Kolesa.kz saityna sılteme jasap.
QR jol erejesıne jaŋa 62-1-tarmaq qosylady, onda «1.1. jol taŋbasymen bölıngen ekı jolaǧy bar ekı baǧytty jolda jäne 3.20 belgısı (basyp ozuǧa tyiym salynady) qoiylǧan jolda qarsy baǧytqa şyǧuǧa bolmaidy» dep jazylady.
Bütın syzyqty kesıp, qarsy jolaqqa şyqqan jürgızuşı äkımşılık kodekstıŋ 596-baby 3-tarmaǧyna sai jazalanady. Ol boiynşa «joldyŋ qarsy qozǧalysqa arnalǧan bölıgımen jürse (kerı ainalu nemese būrylu üşın şyqsa), 6 ai merzımge kölık basqaru qūqyǧynan aiyrylady».
Sondai-aq, tek öz jolaǧymen būrylu kerek.
53-tarmaq («Manevr jasau» bölımı) tolyǧyp, «būrylys joldyŋ jürıs bölıgınıŋ qiylysynan şyqqan kezde kölık qūraly qarsy kele jatqan kölık jaǧyna şyqpaityndai jüzege asyrylady. Būrylys manevr jasaǧan sättegı jolaq boiynşa jüzege asyrylady» dep jazylady.
Jaŋa talapty oŋǧa būrylǧanda da, solǧa būrylǧanda da saqtau kerek. Qiylysta körşı jolaqqa auysuǧa bolmaidy. Kolesa.kz redaksiiasyna QR IIM Äkımşılık polisiia komitetı tüsındırgendei, mūndai jaǧdaida jürgızuşı öz jolaǧymen būryluy kerek, eger ol bos bolmasa, tıke jüru kerek, qiylysta jolaq auystyruǧa tyiym salynady.
Komitet avtobus jolaǧy bar köşege (mysaly, Abaiǧa) būrylǧanda, jürgızuşı arnaiy jolaqqa emes, avtomobil jolaǧyna manevr jasauy kerek ekenın aitty. Būl şekteu M3 sanatyndaǧy avtobustarǧa äser etpeidı, 6 mamyrdan bastap olar arnaiy jolaqpen jüre alady.
Jaŋa 54-1-tarmaqta «radiusyna qaramastan, qozǧaluǧa qauıpsız bolsa jäne basqa kölık qūralyna kedergı jasamasa ǧana kerı būryluǧa bolady» dep jazylady. Iаǧni, radiusy ülken qiylysta da, kışı qiylysta da kerı būryluǧa rūqsat berıledı. Tek qiylysatyn jolmen jürıp bara jatqan avtomobilge kedergı jasamasaŋyz bolǧany.
Al qiylystan ötu tärtıbı 95-1-tarmaqta körsetılgen. Onda «qiylysta solǧa būrylǧan kezde keibır erekşe geometriialyq parametrı bar qiylystardy qospaǧanda, qarsy baǧytta kele jatqan maşinanyŋ oŋ jaǧynan ötu kerek» dep jazylǧan. Iаǧni, jürgızuşıler däl qazırgıdei būryla beredı. Būl jolǧy özgerıste bilık qazırgı shemany zaŋdastyrdy.
6 mamyrdan bastap qozǧalys qauıpsızdıgı men qorşaǧan ortaǧa qauıp töndıretın aqaular men jaǧdailar tızımıne özgerıs endı. Endı tereze deflektoryn ornatuǧa bolady. Mūndai tiuning üşın eşkım aiyppül arqalaǧan emes, bıraq mamandar būl jaily arnaiy bap qosyp otyr. Al zauyttyq jüksalǧyş pen tırkeme ornatu qaita jabdyqtau bolyp sanalmaidy.
Odan bölek, jol erejesıne jaŋa jol belgılerı, jol taŋbalary jäne baǧdarşamdaǧy jasyl tüstı «plius» belgı qosyldy.
