Aqtóbe oblysynda poshta qyzmetkerleri jalaqynyń azdyǵyna narazylyq bildirýde. Aıtýlarynsha, qazirgi qymbatshylyq jaǵdaıynda 62 myń teńge jalaqy kúnkóriske jetpeıdi. Onyń ústine, jumys kólemi aýyr, al tólenetin eńbekaqy laıyqty deńgeıde emes, dep habarlaıdy "Adyrna" ulttyq portaly Eýrazııa birinshi arnasyna silteme jasap.
Búginde aımaqta 600-den astam poshtashy jumys isteıdi. Olardyń bir bóligi kelisimshart arqyly eńbektenýde. Poshta qyzmetkerleriniń aıtýynsha, bir hatty jetkizý quny 85 teńge, al gazet tasymaldaý aqysy – 12 teńge ǵana. Mundaı tómen baǵa jumysshylardyń tabysyn tym mardymsyz etip otyr.
“Men kelisimshart negizinde jumys isteımin. Jalaqym tasymaldaǵan gazet pen hat sanyna qaraı esepteledi. Nátıjesinde, kúnine orta eseppen 2 myń teńge ǵana tabýym múmkin. Bul óte az. Qazirgi qymbatshylyq jaǵdaıynda aı saıyn 62 myń teńge tabys tabý qıyn. Onyń jartysy jalǵa alynǵan páterge ketedi”, – deıdi poshtashy Gúlzıra Jumalına.
Poshtashylardyń taǵy bir bóligi kelisimshartsyz jumys isteıdi. Bul jaǵdaıda ár tasymaldanǵan hat pen gazet úshin jeke aqy tólenedi. Biraq, jumys qıyn bolǵanymen, beriletin tólem eńbekti aqtamaıdy.
“Mysaly, men 5-ýchastkede tursam, biraq jetkizý kerek hat 99-ýchastkege jiberilýi múmkin. Bul – uzaq qashyqtyq. Keıde mekenjaıǵa barǵanymyzda, ıeleri kóship ketken nemese hatty alýdan bas tartqan bolyp shyǵady. Mundaı jaǵdaıda biz hatty qaıta alyp kelemiz, biraq tek jetkizilgen hattarǵa ǵana aqsha tólenedi. Kelisimshart negizindegi aılyǵym 58-62 myń teńgeden aspaıdy”, – deıdi poshta qyzmetkeri Lıýdmıla Kýbaeva.
Alaıda “Qazpochta” basshylyǵy 62 myń teńge kóleminde jalaqy tólenbeıtinin alǵa tartty. Fılıal dırektory Dınara Hasanǵalıeva jalaqy mólsheri oryndalǵan jumys kólemine baılanysty ekenin túsindirdi.
“Bizde 65 myń teńge kólemindegi turaqty jalaqy joq. Barlyǵy oryndalǵan jumysqa baılanysty. Qansha gazet, hat, jýrnal tasymaldaǵanyna qaraı tólenedi. Máselen, keıbir qyzmetkerler 150-180 myń teńgege deıin tabys tabady. Bul jumys kólemine tikeleı baılanysty”, – dedi ol.
“Qazpochta” basqarma tóraıymy Ásel Janasova da qyzmetkerler jalaqysynyń tómen ekenin moıyndap, olardyń kóbiniń qosymsha jumystary bar ekenin aıtty.
“Meniń aılyǵym – 1 mıllıon 200 myń teńge. Bizde tolyq emes jumys kúnimen isteıtin qyzmetkerler bar. Keıbiri basqa jerde tirkelmeı jumys istep, tek qosymsha tabys úshin bizge keledi. Árıne, olardyń tabysy az bolyp kórinedi. Biraq olardyń eki-úsh jumysy bar”, – dedi ol.
Aıta keteıik, buǵan deıin “Qazpochtada” 273 mıllıon teńgeden astam qarjy jymqyrý, alaıaqtyq, urlyq jáne para alý faktileri anyqtalǵan bolatyn.
