Germanııadan Nazarbaev áýletine tıesili záýlim saraılar tabyldy

3788
Adyrna.kz Telegram

Qazaqstannyń Tuńǵysh Prezıdenti Nursultan Nazarbaevtyń qyzy Dınara Qulybaeva men onyń kúıeýi Tımýr Qulybaev Germanııada tórt záýlim jyljymaıtyn múlik satyp alýǵa júz mıllıon dollardan astam qarjy salǵan, dep jazady "Adyrna" ulttyq portaly nege.kz saıtyna siltep.

Olardyń tabylǵan sándi saraılary týraly Deutsche Welle (DW) nemis medıa kompanııasynyń zertteýinde aıtyldy. Maqalada Qazaqstannyń burynǵy prezıdentiniń otbasy múshelerine tıesili záýlim saraılardyń biri Germanııanyń Baden-Baden kýrortyndaǵy Zeelah úıi ekendigi aıtylǵan.

Bul jer 19 ǵasyrda áıgili orys dıplomaty, qupııa keńesshi Mıhaıl Hreptovıchtiń rezıdenııasy bolǵan. Ǵımarat ishi freskalarmen, sándi lıýstralarmen jáne túrli japsyrmalarmen bezendirilgen. Al tóbeleri qundy aǵashtan jasalǵan.

Sondaı-aq, jýrnalıster záýlim saraıdyń aýmaǵynda sýburqaqtary bar landshaft parki bar ekenin, al onyń astynda myń sharshy metrge jýyq kýrorttyq aımaq bar ekenin aıtady.

DW málimetteri boıynsha, Zeelah úıinen basqa, erli-zaıypty Qulybaevtardyń aımaqta taǵy úsh jyljymaıtyn múlki bar. Olardyń ekeýi tarıhy eskertkishterge jatady. Biri — áıgili sáýletshi Gýstav Stronyń vıllasy bolsa, ekinshisi bir kezderi Germanııanyń birinshi kanleri Konrad Adenaýerdiń ózi demalýdy unatqan Býlerhaı saraıy kórinedi.

Buǵan deıin 2006 jyly Nursultan Nazarbaevtyń kishi qyzy Álııa Nazarbaeva brıtan azamattyǵyn alý úshin Londonnyń soltústiginen jekejaı satyp alǵany aıtylǵan. The Sunday Telegraph anyqtaǵandaı, ol Qazaqstan aýmaǵynan 300 mıllıon dollardy shyǵarǵannan keıin osy jyljymaıtyn múlikti satyp alýǵa edáýir qarajat jumsaǵan.

"Adyrna" ulttyq portaly

Pikirler