ۇجىمدىق قاۋىپسىزدىك شارتى ۇيىمى (ۇقشۇ) قازاقستاندا 2 مىڭنان استام اسكەري قىزمەتكەردىڭ قاتىسۋىمەن اۋقىمدى وقۋ-جاتتىعۋلار وتكىزۋدە. بۇل تۋرالى ۇيىمنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«قازاقستاندا «بەرەگ» پوليگونىندا ۇقشۇ بىتىمگەرشىلىك كۇشتەرىمەن «مىزعىماس باۋىرلاستىق-2024» كوماندالىق-شتابتىق وقۋ-جاتتىعۋىنىڭ بەلسەندى كەزەڭىن اشۋ سالتاناتتى ءراسىمى ءوتتى. وقۋ-جاتتىعۋعا بەلارۋس، قازاقستان، قىرعىزستان، رەسەي جانە تاجىكستان بىتىمگەرشىلىك كۇشتەرىنىڭ ۇلتتىق كونتينگەنتتەرى، بىرلەسكەن شتابتىڭ جەدەل توپتارى مەن ۇقشۇ حاتشىلىعى قاتىسۋدا»، - دەلىنگەن حابارلامادا.
اتاپ وتكەندەي، وقۋ-جاتتىعۋعا بارلىعى 2 مىڭنان استام اسكەري قىزمەتشى، 500 بىرلىك بروندى جانە اۆتوموبيلدىك ماشينالار، مي-17, مي-35 تىكۇشاقتارى، يل-76 جانە سي-295 ۇشاقتارى، ۇشقىشسىز ۇشاقتار جۇمىلدىرىلدى.
