Ұжымдық қауіпсіздік шарты ұйымы (ҰҚШҰ) Қазақстанда 2 мыңнан астам әскери қызметкердің қатысуымен ауқымды оқу-жаттығулар өткізуде. Бұл туралы ұйымның баспасөз қызметі мәлімдеді, деп хабарлайды “Адырна” ұлттық порталы.
«Қазақстанда «Берег» полигонында ҰҚШҰ бітімгершілік күштерімен «Мызғымас бауырластық-2024» командалық-штабтық оқу-жаттығуының белсенді кезеңін ашу салтанатты рәсімі өтті. Оқу-жаттығуға Беларусь, Қазақстан, Қырғызстан, Ресей және Тәжікстан бітімгершілік күштерінің ұлттық контингенттері, бірлескен штабтың жедел топтары мен ҰҚШҰ хатшылығы қатысуда», - делінген хабарламада.
Атап өткендей, оқу-жаттығуға барлығы 2 мыңнан астам әскери қызметші, 500 бірлік броньды және автомобильдік машиналар, Ми-17, Ми-35 тікұшақтары, Ил-76 және Си-295 ұшақтары, ұшқышсыз ұшақтар жұмылдырылды.
