تۇركىستان وبلىسىندا 19 جاستاعى جاسۇلان ءابدىماناپتىڭ ءولى دەنەسى تابىلدى. ول 20 اقپاندا مونشاعا كەتىپ، قايتا ورالماعان. ەكى كۇننەن كەيىن ونىڭ دەنەسى دالادا تابىلدى. مارقۇمنىڭ جاقىندارىنىڭ ايتۋىنشا، ونى ءوز اۋىلداستارى قيناپ ولتىرگەن، دەپ حابارلايدى "ادىرنا" ۇلتتىق پورتالى.
مارقۇمنىڭ اناسى رايحان جامالوۆانىڭ ايتۋىنشا، ۇلى اۋىلداستارىنا سەنىپ، ولار ءۇشىن بىرنەشە نەسيە راسىمدەگەن. جاسۇلان نەسيەنى تولەۋ ماسەلەسىن قوزعاعان كەزدە قارىز العاندار ونى ايدالاعا اپارىپ، 14 جەرىنەن پىشاقتاپ ولتىرگەن.
"مەنىڭ بالام ولاردىڭ اناسى اۋىرعانىنا سەنىپ، كومەك قولىن سوزعان. بىراق ولار الداپ، بىرنەشە رەت نەسيە الدىرتىپتى. ەندى قايتارۋ ۋاقىتى كەلگەندە، ونى وسىلايشا ازاپتاپ ءولتىردى", – دەيدى اناسى.
قازىر بۇل قىلمىسقا قاتىستى تەرگەۋ امالدارى ءجۇرىپ جاتىر. قر ءىىم وڭتۇستىك وڭىرلىك اسكەري-تەرگەۋ باسقارماسىنىڭ مالىمەتىنشە، 19 جاستاعى جىگىتتىڭ ولىمىنە كۇدىكتى رەتىندە اسكەري قىزمەتكەر ۇستالىپ، سوتتىڭ سانكتسياسىمەن ەكى ايعا قاماۋعا الىندى.
مارقۇمنىڭ وتباسى بارلىق كىنالىلەردىڭ جاۋاپقا تارتىلۋىن تالاپ ەتۋدە.
