بيىلعى جىلدىڭ جاڭالىعى ەلباسىمىزدىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ىنتىماق پەن بىرلىككە شاقىرار ءداستۇرلى مەيرام – امال مەرەكەسى تۇڭعىش رەت رەسپۋبليكالىق دەڭگەيدە اتالىپ ءوتىلدى. ءماشھۇر-ءجۇسىپ، اباي-شاكارىم، قورقىت اتا، قوجا احمەت ياساۋي، اقمەشىت، سارايشىق، بەكەت اتا كەسەنەلەرىنىڭ جانە ۇلىتاۋ كەشەنى شىراقشىلارىنىڭ قاتىسۋىمەن، ەلىمىزدىڭ ءار ايماعىنان كەلگەن دەلەگاتسيا مۇشەلەرى وتپان تاۋدىڭ باۋىرىندا باس قوستى.
جالپى 2008 جىلدان بەرى امال مەرەكەسىن بارلىق ءسان-سالتاناتىمەن وتپان تاۋدىڭ باسىندا تويلاۋ ۇردىسكە اينالعان بولاتىن.
الپىستان استام كيىز ءۇي تىگىلىپ، ەكى جۇزدەن استام ونەرپاز ونەر كورسەتتى. ۇلتتىق سپورتتىق ويىنداردان جارىستار ءوتىپ، الامان بايگە ۇيىمداستىرىلىپ، جۇلدەلەرگە باعالى سىيلىقتار مەن اقشالاي سىياقى بەرىلدى. مەرەكەلىك شارادا «شاشۋ بوپ جىرىم شاشىلسىن» رەسپۋبليكالىق جىر مەكتەپتەرى وكىلدەرى (جەتىسۋ، ارقا، باتىس، التاي-تارباعاتاي مەكتەپتەرى) مەن «مەن – قازاقپىن!» مەگا-جوباسى جۇلدەگەرلەرىنىڭ كونتسەرتتىك باعدارلاماسى ۇسىنىلدى. «امال-2018» اياسىندا «ايالى اعاش – سايالى» تال وتىرعىزۋ اكتسياسى ءوتتى.
جالپى قاتىسۋشىلار سانى بەس مىڭ ادامدى قۇرايتىن بۇل شارادا قازاق دالاسىنىڭ ونەرىن، سالت-ءداستۇرىن، ۇلتتىق بولمىسىن بەينەلەيتىن قويىلىمدار قويىلىپ، ءان-كۇيدەن، جىر-تەرمەدەن شاشۋ شاشىلىپ، قولونەر جانە ءتۇرلى تاقىرىپتاعى كورمەلەر جۇرتشىلىققا تانىستىرىلدى.
امال مەرەكەسى – تەك مەيرام عانا ەمەس، ول تابيعاتتىڭ تۇرلەنىپ، جاڭارۋى. بۇل حالىق اراسىنداعى كەلىسىمدى ناسيحاتتاپ، بىرلىك پەن اۋىزبىرشىلىككە شاقىراتىن ايتۋلى مەرەكە. بۇل كۇنى قازاقتىڭ قايماعى ساقتالعان، ەڭسەسى بيىك، سالت-ءداستۇرى تەرەڭدە جاتقان ماڭعىستاۋ جۇرتشىلىعى ءبىر-بىرىمەن كورىسۋگە شىعادى. ونىڭ ءمانى – جاڭا جىلعا امان-ەسەن جەتىپ، ءتورت كوز تۇگەل جۇزدەسۋ. سونداي-اق ۇلكەندەرگە ارنايى بارىپ كورىسۋ، اراداعى وكپە-رەنىشتى ۇمىتۋ، كەشىرىم سۇراۋ- وسى كۇنى كورىنىس تابادى.
قالىپتاسقان ۇردىسپەن ماڭعىستاۋدىڭ كوپشىلىگى امال مەيرامىن وتپان تاۋدا قارسى الدى. شارادا قازاقستاننىڭ تۇكپىر-تۇكپىرىنەن عالىمدار، ولكەتانۋشى، تاريحشى، كوپتەگەن قوناقتار مەن تۋريستەر باس قوستى.
قوناقتاردى كۇتۋ، ۇلتتىق ويىن-ساۋىق، ءان-جىر سايىستارىن ناسيحاتتاپ وتكىزۋ جىل سايىن ءار اۋىلعا مىندەتتەلگەن. قازان قايناپ، ادەمى ۇلتتىق ناقىشتاعى كيىمدەردى كيگەن كەلىندەردىڭ شاشباۋى سىلدىرلاپ، سالەم سالىپ، ۇلكەندەردىڭ ءبىر-بىرىمەن كورىسىپ، تىلەك جاۋدىرعان ساتتەرى وتە اسەرلى.
جىلدىڭ باسى بولىپ سانالاتىن ۇلىق مەرەكە سپورتتىق جارىستارمەن باستالدى. شەتپەدەگى اتشاباردا 25 شاقىرىمدىق الامان جارىس ءوتتى. قۇنانورىس اۋلەتى بەلسەندى ءارى جوعارى دەڭگەيدە دايىندالعان الامان بايگەگە باس-اياعى 61 جۇيرىك باق سىناستى. 8 اينالىمدى وتكىزگەن تۇلپارلار بىرىنەن-ءبىرى باسا وزعىسى كەلەدى. جارىستا ءبىرىنشى كەلگەن قاتىسۋشىعا – تەمىر تۇلپار «تويوتا»، ەكىنشى ورىنعا «نيۆا» اۆتوكولىگى، ال ءۇشىنشى ورىنعا موتوتسيكل تىگىلدى.
سونىمەن قاتار 70,80,90 كەلى سالماقتار بويىنشا اۋدارىسپاق ۇيىمداستىرىلدى. وتپان تاۋدا قازاقستاننىڭ ءار وبلىسىنان، ءار اۋدانىنان كەلەتىن قۇرمەتتى قوناقتارعا ارنالىپ بەرەكەلى داستارقان دايىندالدى. جەرگىلىكتى شەبەرلەردىڭ قولىنان شىققان بۇيىمداردان جارمەڭكە دە ۇيىمداستىرىلدى.
اقسارايدا «امال مەرەكەسى – رۋحاني جاڭعىرۋىمىزدىڭ جارشىسى» اتتى دوڭگەلەك ۇستەل ءوتتى. شاراعا جان-جاقتاعى كورشى وبلىستاردان قوناقتار جينالدى. اتاپ ايتساق، قاراعاندى، شىعىس قازاقستان، اتىراۋ وبلىسى جانە تۇركىستان قالاسىنان كەلگەن زيالىلار باس قوسىپ، ءوز ويلارىن ورتاعا سالدى. باسقوسۋدا ەلباسىنىڭ ماقالاسى كەڭىنەن تالقىلانىپ، وي-پىكىر ورتاعا سالىندى. كورىسۋ مەرەكەسىنىڭ ءمان-ماعىناسى ءتۇسىندىرىلىپ، ءبىر- بىرىنە اقجارما اق تىلەكتەرىن ارنادى. وبلىستان كەلگەن قوناقتار تويدىڭ كەرەمەت ءوتىپ جاتقاندىعى جانە ونىڭ جاستارعا بەرەرى مول ەكەندىگىن اتاپ ءوتتى. تۇركىستان قالاسى «ازىرەت سۇلتان» مەملەكەتتىك تاريحي-مادەني قورىق-مۋزەي ديرەكتورى نۇربولات احمەتجانوۆ مۇراجايعا ارنايى اكەلگەن سىيىن تارتۋ ەتتى.
وبلىس اكىمى ەرالى توعجانوۆ جينالعان جۇرتشىلىقتى امال مەرەكەسىمەن قۇتتىقتادى. امالدا ايتىلار كول-كوسىر كوپتىڭ تىلەكتەرى قابىل بولسىن دەگەن وبلىس اكىمى شىراقشىلارمەن بىرگە «بىرلىك وتىن» تۇتاتتى. ءبىر-بىرىنە اقجارما تىلەكتەرىن ارناعان جينالعان جۇرتشىلىق مەرەكەلىك كونتسەرتتى تابيعات اياسىندا كوتەرىڭكى كوڭىل-كۇيمەن قىزىقتادى.
الما مۇسىرەپوۆا
ماڭعىستاۋ وبلىسى
anatili.kazgazeta.kz
