ءۇش ادامنىڭ ءومىرىن قيعان جانتۇرشىگەرلىك جول اپاتى بويىنشا تەرگەۋ اياقتالدى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
باسىلىم دەرەگىنشە، جابىرلەنۋشى تاراپتىڭ ادۆوكاتى ولەگ چەرنوۆ ىس ماتەريالدارى جاقىن كۇندەرى سوتقا جولداناتىنىن جازعان.
«ەرتەڭ سوتتار، ازاماتتارعا كونسۋلتاتسيالار بار. ءال-فارابيداعى جول اپاتى بويىنشا ءىستى زەردەلەۋگە كىرىسەمىز. تەرگەۋ اياقتالدى»، – دەدى ول.
ايتا كەتەيىك، 6 مامىر كۇنى ءىىم ورىنباسارى سانجار ءادىلوۆ اتالعان ءىستىڭ تەرگەۋى سوڭعى كەزەڭگە وتكەنىن حابارلاعان ەدى.
«الماتىداعى جول اپاتى بويىنشا ءىس اياقتالۋ ساتىسىندا. جاقىن كۇندەرى ماتەريالدار الدىمەن جابىرلەنۋشى تاراپقا، كەيىن كۇدىكتى مەن ونىڭ قورعاۋشىلارىنا تانىسۋ ءۇشىن بەرىلەدى»، – دەگەن ءوز سوزىندە.
بۇعان دەيىن نەگىزگى ىسپەن قاتار پوليتسيا قىزمەتكەرىنىڭ ارەكەتسىزدىگىنە قاتىستى ەكىنشى قىلمىستىق ءىس تە تەرگەلىپ جاتقانى حابارلانعان.
26 ناۋرىزدا ءىىم رەسمي وكىلى شىڭعىس الەكەشەۆ الماتى پوليتسيا دەپارتامەنتى باسشىلارىنىڭ ءبىرىنىڭ جۇرگىزۋشىسىنە قاتىستى قىلمىستىق ءىس قوزعالعانىن مالىمدەگەن ەدى.
مينيسترلىك مالىمەتىنشە، بۇل ءىس تە اياقتالۋعا جاقىن جانە جۋىردا سوتقا جولدانادى. كۇدىكتى قاماۋعا الىنعان.
ايتا كەتەيىك، قايعىلى جول اپاتى 21 ناۋرىزعا قاراعان ءتۇنى ءال-فارابي داڭعىلى مەن مەڭدىقۇلوۆ كوشەسىنىڭ قيىلىسىندا بولعان. جوعارى جىلدامدىقپەن كەلە جاتقان Zeekr كولىگى قارسى جولاققا شىعىپ كەتىپ، Mercedes اۆتوكولىگىمەن سوقتىعىسقان.
سالدارىنان Mercedes جۇرگىزۋشىسى مەن ەكى جولاۋشى قىز وقيعا ورنىندا كوز جۇمدى. قازا تاپقانداردىڭ جاسى 20, 22 جانە 29-دا بولعان.
