ەلىمىزدە ورىن العان توتەنشە جاعدايعا بايلانىستى ازاماتتارعا نەسيە مەن يپوتەكالىق قارىز تولەمىن مەرزىمىنەن كەشىكتىرگەنى ءۇشىن ايىپپۇل سالىنبايدى. بۇل تۋرالى قر ۇلتتىق بانكىنىڭ ءباسپاسوز قىزمەتى مالىمدەدى. باياندامادا ەلىمىزدە ورىن العان وقيعاعا وراي توتەنشە جاعداي كەزىندە (5-19 قاڭتار) بانك نەسيەلەرىنىڭ تولەمىن جۇزەگە اسىرۋدا ەشقانداي ايىپپۇل مەن ءوسىمپۇلدار قاراستىرىلمايتىنى ايتىلعان. ءوز كەزەگىندە وسى تەكتەس مالىمدەمەلەردى قازاقستاندىق ەكىنشى دەڭگەيلى «وتباسى بانكى»، «حالىق بانكى»، «ەۋرازيالىق بانك»، «بانك تسەنتر كرەديت»، «التىن بانك»، «حوۋم كرەديت»، «الفا بانك»، Kaspi جانە Forte سەكىلدى بانكتەر جاسادى. سول سەبەپتى، بانكتەن قارىز العانداردىڭ الاڭداماۋىنا بولادى.
سونداي-اق اتالمىش قارجى ۇيىمدارى يپوتەكالىق تولەمدەر بويىنشا دا وسىنداي شارالار قابىلدانعانىن جەتكىزدى.
ايتا كەتۋ كەرەك، جاپپاي تارتىپسىزدىكتەر كەزىندە شىمكەنت قالاسىنىڭ كەيبىر ساۋدا نۇكتەلەرى مەن قوعامدىق ورىندارىنداعى بانكوماتتار قيراتىلعان بولاتىن. دەگەنمەن تۇرعىنداردىڭ ءبىرازى بانكومات قىزمەتىن پايدالانىپ ۇلگەردى.
شىمكەنت قالاسى اكىمدىگى تاراتقان رەسمي مالىمەتكە سايكەس، ەكىنشى دەڭگەيلى بانك فيليالدارى قاڭتاردىڭ ونىنان باستاپ جۇمىستارىنا قايتا كىرىسپەك. ءوز كەزەگىندە جاۋاپتى ورگاندار قولما-قول اقشا وپەراتسيالارىندا ەشقانداي ماسەلە تۋىندامايتىنىنا سەنىم ءبىلدىردى. سوندىقتان بيلىك وكىلدەرى حالىقتى سابىرعا شاقىرىپ، الاڭداۋعا ەش نەگىز جوق ەكەنىن مالىمدەدى.
