بۇگىن ەلىمىزدە جالپىحالىقتىق ازا تۇتۋ كۇنى. قاراعاندى وبلىسىنىڭ اكىمى جەڭىس قاسىمبەك قايعىلى وقيعادا قازا بولعانداردىڭ جاقىندارىنا كوڭىل ايتتى، دەپ حابارلايدى "ادىرنا" ۇلتتىق پورتالى.
- بۇگىن جالپىحالىقتىق ازا تۇتۋ كۇنى قازا تاپقان بەيبىت ازاماتتاردىڭ جانە وزدەرىنىڭ كاسىبي بورىشتارىن اتقارا وتىرىپ، قازا بولعان جۋرناليستەر، دارىگەرلەر، ءورت سوندىرۋشىلەر، پوليتسەيلەر مەن اسكەري قىزمەتشىلەردىڭ وتباسىلارىنا، تۋعان-تۋىستارى مەن جاقىندارىنا قايعىرىپ، كوڭىل ايتامىز. ولار حالىققا سوڭىنا دەيىن ادال قىزمەت ەتتى، - دەپ جازدى وبلىس باسشىسى Facebook-تەگى پاراقشاسىندا.
جەڭىس قاسىمبەك قازا بولعانداردىڭ اراسىندا جەرلەستەرى ءادىل نۇركەنوۆ بارىن جازدى.
- قازا بولعانداردىڭ اراسىندا ءبىزدىڭ جەرلەسىمىز، الماتىدا قىزمەتتىك بورىشىن ورىنداۋ كەزىندە قازا تاپقان ۇلتتىق قاۋىپسىزدىك ورگاندارىنىڭ كاپيتانى ءادىل نۇركەنوۆ بار. ءادىلدىڭ وتباسىنا بارلىق قاجەتتى مورالدىق جانە ماتەريالدىق قولداۋ كورسەتىلەتىن بولادى، - دەپ جازدى وبلىس اكىمى.
"ادىرنا" ۇلتتىق پورتالى
