قازاقستان پرەزيدەنتى قاسىم-جومارت توقاەۆ كوميسسيا قۇرامىنا پرەزيدەنت اكىمشىلىگىنىڭ قىزمەتكەرلەرى كىرگەنىن مالىمدەدى، دەپ حابارلايدى "ادىرنا" ۇلتتىق پورتالى
ول رەسپۋبليكالىق جەدەل شتابتىڭ تۇراقتى جۇمىس ىستەپ جاتقانىن اتاپ ءوتتى.
كوميسسياعا ەلىمىزدەگى تۇراقتىلىق مۇددەسى ءۇشىن تۋىنداعان ماسەلەنىڭ ەكى تاراپقا دا قولايلى شەشىمىن تابۋ تاپسىرىلدى. قۇقىق قورعاۋ ورگاندارىنا قوعامدىق ءتارتىپتىڭ بۇزىلماۋىن قاداعالاۋ تاپسىرىلدى. دەمونسترانتتار جاۋاپكەرشىلىك پەن ديالوگقا دايىن بولۋى كەرەك، دەدى قازاقستان پرەزيدەنتى قاسىم-جومارت توقاەۆ.
2 قاڭتاردا جاڭاوزەن تۇرعىندارى سۇيىتىلعان گاز باعاسىنا نارازىلىقتارىن بىلدىرگەنى بەلگىلى بولدى. باعانىڭ كوتەرىلۋ سەبەبىن ەنەرگەتيكا مينيسترلىگى ءتۇسىندىردى.
2022 جىلدىڭ 1 قاڭتارىنان باستاپ سكگ ساۋداسىنىڭ تاۋار بيرجالارىنا تولىق كوشۋى جۇزەگە اسىرىلدى. ماڭعىستاۋ وبلىسىنا قاڭتار ايىندا جەتكىزىلگەن سۇيىتىلعان گازدىڭ ورتاشا كوتەرمە باعاسى تونناسىنا 133 126 تەڭگەنى نەمەسە ليترىنە 78 تەڭگەنى قۇرادى. بۇل رەتتە بولشەك ساۋدا باعاسى اقتاۋ، جاڭاوزەن قالالارىندا، سونداي-اق ماڭعىستاۋ وبلىسىندا ليترىنە 100-120 تەڭگەنى قۇرادى.
قر ەم ءباسپاسوز قىزمەتى
جەلتوقساننىڭ 2-ءسى كۇنى وتكەن بريفينگتە ماڭعىستاۋ وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى بەردىبەك قارتباەۆ بۇگىندە وبلىستا قاجەتتى گاز كولەمى بار ەكەنىن اتاپ ءوتتى. زاۋىتتار قالىپتى جۇمىس ىستەپ، جەتكىزۋ كەستەگە ساي جۇرگىزىلۋدە.
كەيىن مەملەكەت باسشىسىنىڭ تاپسىرماسىن ورىنداۋ ماقساتىندا ۇكىمەت سۇيىتىلعان مۇناي گازىنىڭ (سكگ) باعاسىن رەتتەۋ بويىنشا كەشەندى شارالاردى جۇزەگە اسىراتىنى بەلگىلى بولدى.
"ادىرنا" ۇلتتىق پورتالى
