پوليتسيا قىزمەتكەرلەرى جۋرناليست اينۇر كوسكينانىڭ ءوتىنىشى بويىنشا قر پارلامەنتى ماجىلىسىنە كەلدى. بۇگىن عانا قىزمەتىنەن كەتكەن دەپۋتات بەكبولات تىلەۋحان جۋرناليستپەن جانجالداسىپ قالدى، دەپ حابارلايدى “ادىرنا” ۇلتتىق پورتالى BaigeNews.kz سايتىنا سىلتەمە جاساپ.
اينۇر كوسكينانىڭ ايتۋىنشا، ول ءماجىلىس عيماراتىندا ەكس-دەپۋتاتتان سۇحبات الماق بولعاندا دەپۋتات وعان كۇش قولدانعان. جۋرناليست ارىز جازۋدى كوزدەپ وتىر. ونىڭ سوزىنشە، ەكس-دەپۋتاتتىڭ قولى بەت جاعىنا ءتيىپ كەتكەن جانە مونوپودى ەكى ءبولىنىپ قالعان.
بەكبولات تىلەۋحانمەن بولعان وقيعادان كەيىن اينۇر كوسكينا پوليتسياعا حابارلاعان. ال ەكس-دەپۋتات پارلامەنت عيماراتىنان شىعىپ كەتكەن. پوليتسيا قىزمەتكەرلەرى ءبىراز ۋاقىتتان كەيىن كەلگەن.
ەكس-دەپۋتاتتىڭ كومەكشىسى وقيعاعا قاتىستى پىكىر بىلدىرۋدەن باس تارتتى.
“ادىرنا” ۇلتتىق پورتالى
