10 قاراشا كۇنى شىمكەنت قالالىق مامانداندىرىلعان اكىمشىلىك سوتى «جالا جابۋ» بابىمەن سوتقا تارتىلعان جۋرناليست مارينا نيزوۆكينانىڭ ءىسىن توقتاتتى. بۇل تۋرالى «ءادىل ءسوز» حالىقارالىق ءسوز بوستاندىعىن قورعاۋ قورى مالىمدەدى، دەپ حابارلايدى «ادىرنا» ۇلتتىق پورتالى.
«نيزوۆكينا مارينا ۆيكتوروۆناعا قاتىستى قر اقبتك 2 – بولىگىنىڭ 3-تارماعىنىڭ 73-بابى بويىنشا قوزعالعان اكىمشىلىك ءىس توقتاتىلسىن»، - دەپ قاۋلىنى سۋديا سەرىك نيازبەك جاريالادى.
ەرماحان ءابدىرامانوۆ مارينا نيزوۆكينانى ادامنىڭ ار-نامىسى مەن قادىر-قاسيەتىنە نەمەسە ونىڭ بەدەلىنە نۇقسان كەلتىرەتىن كورىنەۋ جالعان اقپارات تاراتتى دەپ ايىپتاعان بولاتىن. الەۋمەتتىك جەلىدەگى ەكى جاريالانىم سوتقا دەيىن جەتكەن.
«2023 جىلدىڭ 11 قىركۇيەگىندە ينسپەكتورلار پوليتسيا باستىعىن كولىكتى جالعان نومىرمەن جۇرگىزگەن دەگەن كۇدىكپەن توقتاتقان. ال 2023 جىلدىڭ 13 شىلدەسىندە ول ءوزىنىڭ فوتوسۋرەتى بار «جالعان جازبانى» كورگەن»، – دەپ حابارلايدى قور.
جۋرناليست شىمكەنت قالاسى بويىنشا سوت ساراپتامالارى ينستيتۋتىنىڭ «قر ءام سوت ساراپتامالارى ورتالىعىنا» جۇگىندى جانە ساراپشىلار پوليتسەيدىڭ ار-نامىسىنا، قادىر-قاسيەتىنە جانە ىسكەرلىك بەدەلىنە نۇقسان كەلتىرەتىن تەرىس مالىمەتتەر جوق دەگەن قورىتىندىعا كەلدى.
ايتالىق، اتالعان ءىس شىلدە ايىندا شىمكەنت قالالىق پد باستىعىنىڭ ءبىرىنشى ورىنباسارى ەرماحان ءابدىرامانوۆ جۋرناليست مارينا نيزوۆكينانى جالا جاپتى دەپ ايىپتاعان. بۇعان ءجۋرناليستىڭ Instagram جەلىسىندەگى جەكە پاراقشاسىندا جاريالانعان ەكى جازباسى سەبەپ بولعان.
«ادىرنا» ۇلتتىق پورتالى
