بەلگىلى جۋرناليست جانە ازاماتتىق بەلسەندى لۇقپان احمەدياروۆتى پوليتسيا قىزمەتكەرلەرى تۇسىنىكسىز جاعدايدا ۇستادى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
جۋرناليست الەۋمەتتىك جەلىدەگى پاراقشاسىنا تۇسىرگەن ۆيدەودا ءوزىن پوليتسيا كولىگىنىڭ ىشىندە كۇشتەپ الىپ بارا جاتقانىن ايتىپ ۇلگەرگەن. ونىڭ ايتۋىنشا، قۇقىق قورعاۋ ورگاندارى ەشقانداي رەسمي قۇجات كورسەتپەي، ونى جانە ارىپتەستەرى راۋل مەن ەركەبۇلاندى دا ۇستاۋعا ارەكەتتەنگەن.
"جاڭا عانا ءتۇسىرىلىم جۇرگىزىپ جاتقانبىز. مەنى جاڭا ۇستادى. پوليتسيا قىزمەتكەرلەرى كۇشتەپ كولىككە وتىرعىزدى. ەشقانداي تۇسىنىك بەرەرلىك قاعاز كورسەتكەن جوق. مەنىڭ ۇستىمنەن قىلمىستىق ءىس قوزعالعانىن ايتتى. قازىر قايدا اپارا جاتقاندارىن دا ناقتى بىلمەيمىن", – دەدى احمەدياروۆ.
جۋرناليست ءوزىنىڭ ۇستالۋىن جۋىردا جاريالاعان ماقالاسىمەن بايلانىستىرادى. ول ماقالادا رەسەيگە الدانىپ، كەيىن ۋكرايناداعى سوعىسقا ءماجبۇرلى تۇردە تارتىلعان قازاقستاندىقتار تۋرالى باياندالعان. بۇل ماقالا جاريالانعاننان كەيىن، قازان قالاسىنداعى قازاقستان كونسۋلدىعى اقپاراتتى جوققا شىعارعان بولاتىن.
"ولاردىڭ تۋىستارى ماعان حابارلاسىپ، سوعىسقا بارۋعا ماجبۇرلەپ جاتقاندارىن ايتتى. بالكىم، مەنىڭ ۇستالۋىم وسى جاعدايمەن بايلانىستى بولار", – دەدى احمەدياروۆ.
لۇقپان سايلاۋۇلى احمەدياروۆ – تانىمال جۋرناليست، ازاماتتىق بەلسەندى. ول 1975 جىلى باتىس قازاقستان وبلىسىندا دۇنيەگە كەلگەن. جۋرناليستيكا سالاسىنا 2001 جىلى قادام باسقان. «ۋرالسكايا نەدەليا» گازەتىندە جۇمىس ىستەگەن ول ءوزىنىڭ كاسىبي قىزمەتى بارىسىندا بىرنەشە رەت قىسىم مەن شابۋىلدارعا ۇشىراعان. 2012 جىلى بەلگىسىز بىرەۋلەر وعان قارۋلى شابۋىل جاساپ، سەگىز پىشاق جاراقاتىن سالعان. سول جىلى ول شەكاراسىز رەپورتەرلار ۇيىمىنىڭ حالىقارالىق سىيلىعىنا يە بولعان.
