قازيتۋ عىلىمي كىتاپحاناسى بيىل ۋنيۆەرسيتەت باسشىلىعىنىڭ قولداۋىمەن كۇردەلى جوندەۋ جۇمىستارىن ءتامامداپ، وقىرمان قاۋىمىنا ۇسىنىلدى. مۇنداعى كوز تارتاتىن كوركەم ءارى كرەاتيۆتى ينتەرەر، جاڭارعان كاتالوگتار كىتاپحاناعا دەگەن سۇيىسپەنشىلىكتى ارتىرا تۇسەدى.
كىتاپحانا – ءارى پايدالى، ءارى كوڭىل جايلاندىراتىن جەرگە اينالعان. كىتاپحانادا جاڭا وقۋ زالى، ەلەكتروندى وقۋ زالى، ءماجىلىس زالى، ماگيسترانتتار زالى مەن كورمەگە قاجەتتى كەڭىستىك بار. جالپى قاراستىرعاندا ستۋدەنتتەردىڭ قولدانۋىنا ىڭعايلى بارلىق جاعدايلار جاسالعان.
سونىمەن قاتار مامانداندىرىلعان وقۋ زالى مەن مەرزىمدى باسىلىمدار وقۋ زالى قولدانىسقا بەرىلگەن. بۇگىنگى تاڭدا كىتاپحاناداعى جالپى كىتاپ قورى 335162 دانا وقۋ جانە عىلىمي ادەبيەتتەن، ونىڭ ىشىندە 141612 دانا قازاق تىلىندەگى كىتاپتاردان، 60067 دانا قوسىمشا ادەبيەتتەن قۇرالعان.
"قازاق جەمىس شارۋاشىلىعى جانە ءجۇزىم شارۋاشىلىعى عىلىمي – زەرتتەۋ ينستيتۋتى", "قازاق قايتا وڭدەۋ جانە تاماق ونەركاسىبى عىلىمي–زەرتتەۋ ينستيتۋتى" سياقتى مەكەمەلەرمەن كەلىسىم شارت جاسالىپ، عىلىمي كىتاپحانا قورى سيرەك كەزدەسەتىن كىتاپتارمەن تولىقتىرىلعان. اربىر پايدالانۋشىعا ۋنيۆەرسيتەتتىڭ ءبىلىم بەرۋ پروتسەسى مەن عىلىمي زەرتتەۋلەرىن قولداۋعا ىقپال ەتەتىن كەز كەلگەن اقپاراتتىق رەسۋرستارعا ساپالى جانە ءتيىمدى قولجەتىمدىلىك بەرىلگەن.
كىتاپحانا عالامدىق ينتەرنەت جەلىسىنە قوسىلعان. قوسىلۋ جىلدامدىعى 100مب/س.، WI-FI بايلانىس نۇكتەسى ارقىلى ەلەكتروندى وقۋ زالىنداعى 24 كومپيۋتەر كومەگىمەن وقىتۋشىلار مەن ستۋدەنتتەر ينتەرنەت رەسۋرستارىن قولدانا الادى.
عىلىمي كىتاپحانادا زامان تالابىنا ساي «كابيس.Full» اۆتوماتتاندىرىلعان قازاقستاندىق باعدارلاماسى ارقىلى وقىرماندارعا قىزمەت كورسەتۋ ۇدەرىسى جاڭاشا تۇردە جۇرگىزىلگەن. كىتاپحاناداعى قىزمەت تۇرلەرى اۆتوماتتاندىرىلىپ، اقپاراتتى جەدەل ىزدەۋ جانە وعان تاپسىرىس بەرۋ جەڭىلدەتىلگەن.
وقىرماندارعا ينتەرنەت جەلىسى ارقىلى رەسپۋبليكالىق جوعارى وقۋ ورىندارى ارالىق ەلەكتروندى كىتاپحانانى (رجەك), Springerlink.com, Clarivate Analitics, حالىقارالىق باسپا كومپانيالارى Springer, Web of Science, Scopus باسىلىمدارىنىڭ دەرەكقورىن تولىعىمەن پايدالانۋعا جاعداي جاسالعان.
سونداي-اق مەرزىمدى باسىلىمدار ماڭىزدى اقپارات كوزى بولىپ تابىلادى. جىل سايىن ۋنيۆەرسيتەت كىتاپحاناسى مەرزىمدى قازاقستاندىق جانە رەسەيلىك باسىلىمدارعا قول قوياد. قازاقستان جانە شەتەل عىلىم اكادەمياسى مەن رەسەيدىڭ جوعارى وقۋ ورىندارى قالىپتاستىراتىن عىلىمي باسىلىمدارعا جازىلۋعا كوپ كوڭىل بولىنگەن. وقۋ پروتسەسىندە ءار ءتۇرلى ءبىلىم سالالارى بويىنشا ەڭ وزەكتى جانە جەدەل اقپاراتتان تۇراتىن مەرزىمدى باسىلىمدار ۇلكەن كومەك كورسەتەدى، ولاردىڭ ىشىندە ۋنيۆەرسيتەتتىڭ ءپروفيلى بويىنشا جۋرنالدار ۇلكەن ۇلەس الادى.
كىتاپحانا قابىرعاسىندا اقىن جازۋشىلار، تانىمال تۇلعالارمەن قىزىقتى كەزدەسۋلەر، قوعامدا بولىپ جاتقان وزەكتى ماسەلەلەرگە ارنالعان دوڭگەلەك ۇستەلدەر، كونفەرەنتسيالار، اشىق ەسىك كۇندەرى ءجيى وتكىزىلىپ تۇرادى. ءار شاراعا كىتاپ كورمەلەرى ۇيىمداستىرىلادى.
ءبىلىم بەرۋ نارىعىندا جوعارى وقۋ ورنىنىڭ باسەكەگە قابىلەتتىلىگىن ارتتىرىپ، ۋنيۆەرسيتەتتىڭ عىلىمي-زەرتتەۋ ۇدەرىستەرىن دامىتۋ ءۇشىن، كىتاپحانانىڭ ورنى ەرەكشە. بيىل ەل تاۋەلسىزدىگىنىڭ 30 جىلدىعى مەن قازيتۋ-دىڭ 20 جىلدىعىندا جاڭارعان كىتاپحانانىڭ قولدانىسقا بەرىلۋى وقىرمان ءۇشىن ۇلكەن قۋانىش بولدى.
