بايدىبەك بي داڭعىلى شىمكەنتتەگى نەگىزى كولىك ماگيسترالىنىڭ ءبىرى. شاھاردىڭ سولتۇستىگى مەن وڭتۇستىگىن بايلانىستىراتىن جولدىڭ تاۋلىكتىك كولىك جۇكتەلىمى سوڭعى جىلدارى ايتارلىقتاي ءوستى. قالانىڭ تۇراقتى ءوسۋ ديناميكاسىن ەسكەرەر بولساق، بۇل ماگيسترالداعى كولىك جۇكتەلىمى جىلدان جىلعا ارتا بەرمەك. ياعني، جولدىڭ كولىك وتكىزۋ قابىلەتىن ارتتىرۋ – ۋاقىت كۇتتىرمەيتىن ماسەلەگە اينالىپ كەلەدى.
قالاداعى كولىك قوزعالىسىن رەتتەۋدىڭ كەشەندى جوسپارىنا سايكەس، بايدىبەك بي داڭعىلى مەن ارعىنبەكوۆ كوشەسىنىڭ قيىلىسىندا 2022-2023 جىلدار ارالىعىندا ءۇش دەڭگەيلى جولايرىق سالىنادى. 2022 جىلعى 5 قاڭتاردا نىساننىڭ العاشقى قازىعى قاعىلىپ، جەر قازۋ جۇمىستارى باستالماق. وسى كۇننەن باستاپ ماگيسترالداعى كولىك قوزعالىسىنا ۋاقىتشا شەكتەۋ قويىلادى.
قۇرىلىسقا بايلانىستى ارعىنبەكوۆ كوشەسىنىڭ قوس باعىتى بويىنشا كولىك قوزعالىسى سەگىز ايعا شەكتەلەدى. باتىستان شىعىسقا قاراي بايتۇرسىنوۆ كوشەسىنەن بايدىبەك بي داڭعىلى ارالىعى جانە شىعىستان باتىسقا قاراي جاياۋ جۇرگىنشىلەرگە ارنالعان جول وتكەلىندەگى باعدارشامنان بايدىبەك بي داڭعىلى ارالىعى جابىلادى. كولىك قوزعالىسى ءۇشىن التەرناتيۆتى ماگيسترالدار رەتىندە رىسقۇلوۆ جانە تولەمەتوۆ كوشەلەرى بەلگىلەنگەن.
جولايرىقتىڭ تەحنيكالىق سيپاتىنا سايكەس، بايدىبەك بي داڭعىلىندا 700 مەتر، ارعىنبەكوۆ كوشەسىندە 921 مەتر كوشە ارالىعى قۇرىلىس اۋماعىنا ەنگەن. قۇرىلىس جوسپارى بويىنشا ەنى 80 مەترلى 4-6 جولاقتى اۆتوماگيسترال سالىنىپ، جول جيەگىنە جاياۋ جۇرگىنشىلەر جانە ۆەلوجول توسەلمەك.
شىمكەنت قالاسىنىڭ اكىمدىگى قالا تۇرعىندارى مەن قوناقتارىنان جولعا بايلانىستى تۋىندايتىن ۋاقىتشا قولايسىزدىقتارعا تۇسىنىستىكپەن قاراۋلارىڭىزدى سۇرايدى.
شىمكەنت قالاسى اكىمدىگىنىڭ ءباسپاسوز قىزمەتى
