Báıdibek bı dańǵyly Shymkenttegi negizi kólik magıstraliniń biri. Shahardyń soltústigi men ońtústigin baılanystyratyn joldyń táýliktik kólik júktelimi sońǵy jyldary aıtarlyqtaı ósti. Qalanyń turaqty ósý dınamıkasyn eskerer bolsaq, bul magıstraldaǵy kólik júktelimi jyldan jylǵa arta bermek. Iaǵnı, joldyń kólik ótkizý qabiletin arttyrý – ýaqyt kúttirmeıtin máselege aınalyp keledi.
Qaladaǵy kólik qozǵalysyn retteýdiń keshendi josparyna sáıkes, Báıdibek bı dańǵyly men Arǵynbekov kóshesiniń qıylysynda 2022-2023 jyldar aralyǵynda úsh deńgeıli jolaıryq salynady. 2022 jylǵy 5 qańtarda nysannyń alǵashqy qazyǵy qaǵylyp, jer qazý jumystary bastalmaq. Osy kúnnen bastap magıstraldaǵy kólik qozǵalysyna ýaqytsha shekteý qoıylady.
Qurylysqa baılanysty Arǵynbekov kóshesiniń qos baǵyty boıynsha kólik qozǵalysy segiz aıǵa shekteledi. Batystan shyǵysqa qaraı Baıtursynov kóshesinen Báıdibek bı dańǵyly aralyǵy jáne shyǵystan batysqa qaraı jaıaý júrginshilerge arnalǵan jol ótkelindegi baǵdarshamnan Báıdibek bı dańǵyly aralyǵy jabylady. Kólik qozǵalysy úshin alternatıvti magıstraldar retinde Rysqulov jáne Tólemetov kósheleri belgilengen.
Jolaıryqtyń tehnıkalyq sıpatyna sáıkes, Báıdibek bı dańǵylynda 700 metr, Arǵynbekov kóshesinde 921 metr kóshe aralyǵy qurylys aýmaǵyna engen. Qurylys jospary boıynsha eni 80 metrli 4-6 jolaqty avtomagıstral salynyp, jol jıegine jaıaý júrginshiler jáne velojol tóselmek.
Shymkent qalasynyń ákimdigi qala turǵyndary men qonaqtarynan jolǵa baılanysty týyndaıtyn ýaqytsha qolaısyzdyqtarǵa túsinistikpen qaraýlaryńyzdy suraıdy.
Shymkent qalasy ákimdiginiń baspasóz qyzmeti
