2007 جىلدىڭ قاڭتارى. جۇمىسىم استاناعا اۋىستى. مەمقىزمەتكە العاش كەلۋىم. ۇزىن ارقان، كەڭ تۇساۋ جۋرناليستيكاعا ۇيرەنگەن ادامنىڭ قاتاڭ ءتارتىپ مەمقىزمەتكە بەيىمدەلۋى وڭاي ەمەس ەكەن. سترەستەن اسقازان اۋىرا باستادى.
شەكتەۋ كوپ. ايلىق از. استىمدا نەسيەگە العان ەسكى كولىگىم بار. وڭ جاعالاۋدا بولمە جالداپ تۇرام. جۇمىس سول جاعالاۋدا.
جۇمىسقا شىقسام قول كوتەرگەن ادام. كۇن سۋىق. جولاي الىپ كەتەم. 500 تگ. ول كەزدە الماتىدا تاكسي ارزان ەدى. 200-300 تگ. وندا دا، ءبىر باعىت بولسا، ادامداردى مىنگەستىرىپ الا بەرەسىڭ.
ال مۇندا ساۋدالاسىپ تۇرمايدى. جۇمىسقا باراردا ءبىر ادام، قايتاردا ءبىر ادام الا كەتەم. تۇسكى اس پەن جاعارماي اقتالىپ جاتىر.
سويتسەم، تەك مەن ەمەس، قاراپايىم شەنەۋنىكتەردىڭ كوبى تاكسيلەتەدى ەكەن. ءالى دە سولاي دەپ ويلايمىن.
بوستوندا 2 جىل تۇردىم عوي. وندا دا سول. مۇعالىمدەر قول بوس كەزدە Uber ارقىلى تاكسيلەتەدى. قوسىمشا قارجى تابادى، سالىق تولەيدى.
قازىر مەمقىزمەتكەرلەرگە قوسىمشا جۇمىس ىستەۋگە رۇقسات بەرۋ قاراستىرىلىپ جاتىر ەكەن. قوس قولداپ قولدايمىن.
مەمقىزمەتكەرلەردىڭ بارلىعىنىڭ ىشكەنى الدىندا، ىشپەگەنى ارتىندا شالقىپ ءومىر سۇرەدى دەپ ويلايتىندار قاتەلەسەدى.
تابىس جاعىنان قارار بولساق، قازىر مەمقىزمەتكەر بولىپ شەكتەۋمەن ءومىر سۇرگەننەن، ءبىر يپ اشىپ الىپ، شاعىن كاسىپپەن اينالىسقان تيىمدىرەك. سوندىقتان دا بولار، مەمقىزمەتكە كەزەككە تۇرعان ادام از.
وسىنى ەسكەرىپ، مەمقىزمەتتىڭ تارتىمدىلىعىن ارتتىراتىنداي جاعدايلار قاراستىرىلىپ، حالىقارالىق تاجىريبە قاراستىرىلعانى ءجون.
