قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى ماقسات رامانقۇلوۆ پەن فاحريددين قاراتاەۆ شىمكەنت قالاسىنا ارنايى جۇمىس ساپارمەن كەلدى. حالىق قالاۋلىلارى الدىمەن قاراتاۋ اۋداندىق جاستار رەسۋرستىق ورتالىعىندا بولىپ، بەلسەندى جاستارمەن كەزدەستى.
كەزدەسۋ بارىسىندا دەپۋتاتتار ەلىمىزدە جۇرگىزىلىپ جاتقان رەفورمالار، جاستاردى قولداۋ ءۇشىن مەملەكەت تاراپىنان اتقارىلىپ جاتقان جۇمىستار تۋرالى اڭگىمەلەدى.
—بيىل تاۋەلسىزدىگىمىزگە 30 جىل تولىپ وتىر. ەلباسى جاقىندا جارىق كورگەن ماقالاسىندا «وسى جىلدار ىشىندە الەمدىك عىلىم مەن مادەنيەتتىڭ ەڭ ۇزدىك جەتىستىكتەرىن مەڭگەرگەن جاڭا ۇرپاق قالىپتاستى» دەپ اتاپ ءوتتى. مىنە، سىزدەر، سول تاۋەلسىزدىك ۇرپاعىسىزدار! ەلىمىزدىڭ بولاشاعى جارقىن، قازاقستان مىقتى بولۋى سىزدەرگە بايلانىستى. ەلدى كوركەيتۋ ءۇشىن بىرلىگىمىزدى بەكەمدەپ، جاستارىمىزدىڭ دەنى ساۋ، ءبىلىمدى دە باي-قۋاتتى بولۋىنا ءمان بەرۋىمىز كەرەك. دەنساۋلىق ءۇشىن سپورتپەن اينالىسۋ، ساپالى ءبىلىم ءۇشىن كوپ وقۋ، باي بولۋ ءۇشىن ادال كاسىپ ىستەۋ جانە بىرلىكتى ساقتاۋ ءۇشىن ارقايسىمىز ىشكى مادەنيەتىمىزدى ارتتىرۋىمىز كەرەك. ەڭ باستىسى، بۇگىندە مەملەكەت جاستارعا وسىنىڭ بارلىعىن جاساۋعا مۇمكىندىك بەرىپ وتىر. قازاقستاندا ءبىلىم الامىن، بيزنەسپەن اينالىسامىن دەگەن ادامعا بارلىق مۇمكىندىك بار. بىزگە ەشكىم جاقسى ءومىر مەن جارقىن بولاشاقتى دايىنداپ بەرمەيدى. ءبارىمىز ءبىر كىسىنىڭ بالاسىندا ەڭبەك ەتىپ، العا ۇمتىلۋىمىز كەرەك، – دەدى دەپۋتات م.رامانقۇلوۆ.
كەزدەسۋ بارىسىندا جاستار دەپۋتاتتارعا وزدەرىن مازالاعان سۇراقتارىن قويىپ، ويلارىن ورتاعا سالدى.
مۇنان كەيىن تومەنگى پالاتا وكىلدەرى شىمكەنت قالالىق ازاماتتىق اليانسىنىڭ «ازاماتتىق رەسۋرستىق ورتالىعىنىڭ» جۇمىسىمەن تانىسىپ، ۇكىمەتتىك ەمەس ۇيىمداردىڭ، ەتنومادەني بىرلەستىكتەردىڭ وكىلدەرىمەن جانە قوعامدىق پىكىردىڭ كوشباسشىلارىمەن كەزدەستى.
ايدار قۇلجانوۆ،
فوتو سەرىك قوساەۆ
