Qazaqstan Respýblıkasy Parlamenti Májilisiniń depýtattary Maqsat Ramanqulov pen Fahrıddın Qarataev Shymkent qalasyna arnaıy jumys saparmen keldi. Halyq qalaýlylary aldymen Qarataý aýdandyq jastar resýrstyq ortalyǵynda bolyp, belsendi jastarmen kezdesti.
Kezdesý barysynda depýtattar elimizde júrgizilip jatqan reformalar, jastardy qoldaý úshin memleket tarapynan atqarylyp jatqan jumystar týraly áńgimeledi.
—Bıyl Táýelsizdigimizge 30 jyl tolyp otyr. Elbasy jaqynda jaryq kórgen maqalasynda «Osy jyldar ishinde álemdik ǵylym men mádenıettiń eń úzdik jetistikterin meńgergen jańa urpaq qalyptasty» dep atap ótti. Mine, Sizder, sol táýelsizdik urpaǵysyzdar! Elimizdiń bolashaǵy jarqyn, Qazaqstan myqty bolýy Sizderge baılanysty. Eldi kórkeıtý úshin birligimizdi bekemdep, jastarymyzdyń deni saý, bilimdi de baı-qýatty bolýyna mán berýimiz kerek. Densaýlyq úshin sportpen aınalysý, sapaly bilim úshin kóp oqý, baı bolý úshin adal kásip isteý jáne birlikti saqtaý úshin árqaısymyz ishki mádenıetimizdi arttyrýymyz kerek. Eń bastysy, búginde memleket jastarǵa osynyń barlyǵyn jasaýǵa múmkindik berip otyr. Qazaqstanda bilim alamyn, bıznespen aınalysamyn degen adamǵa barlyq múmkindik bar. Bizge eshkim jaqsy ómir men jarqyn bolashaqty daıyndap bermeıdi. Bárimiz bir kisiniń balasynda eńbek etip, alǵa umtylýymyz kerek, – dedi depýtat M.Ramanqulov.
Kezdesý barysynda jastar depýtattarǵa ózderin mazalaǵan suraqtaryn qoıyp, oılaryn ortaǵa saldy.
Munan keıin tómengi palata ókilderi Shymkent qalalyq Azamattyq alıansynyń «Azamattyq resýrstyq ortalyǵynyń» jumysymen tanysyp, úkimettik emes uıymdardyń, etnomádenı birlestikterdiń ókilderimen jáne qoǵamdyq pikirdiń kóshbasshylarymen kezdesti.
Aıdar QULJANOV,
Foto Serik QOSAEV
