شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى 2016-2020 جىلدار ارالىعىندا قازاقستان اۋماعىندا باحرەين كورولدىگىنە قىزداردى جىبەرۋمەن اينالىسقان ترانسۇلتتىق ۇيىمداسقان قىلمىستىق توپتىڭ جەتەكشىلەرى مەن مۇشەلەرىنە، سونداي-اق ولاردىڭ سىبايلاستارىنا قاتىستى ۇكىم شىعاردى، دەپ حابارلايدى "ادىرنا" ۇلتتىق پورتالى "Stan.kz"-كە سىلتەمە جاساپ.
بۇل تۇلعالار سوت ۇكىمىمەن كىنالى دەپ تانىلىپ، ولارعا ءتۇرلى جازالار تاعايىندالدى. تۇقت باسشىسى س.ازادوۆا 14 جىلعا باس بوستاندىعىنان ايىرىلدى.
قىلمىستىق توپتىڭ باسقا دا مۇشەلەرى مەن سىبايلاستارى س.احمەدوۆا، ە.بەركينا، ش.احمەدوۆا، ش.تۇرعىنوۆا 12 جىلعا باس بوستاندىعىنان ايىرىلدى; ر.قوسداۋلەتوۆا، ە.تەمىروۆا 11,3 جىلعا باس بوستاندىعىنان ايىرىلدى; ر.تسەسحلادزە 10 جىلعا باس بوستاندىعىنان ايىرىلدى; ساۆينسكي س. مەن مادادوۆ ي. 6,8 جىلعا باس بوستاندىعىنان ايىرۋ;
پيچۋگين ز. مەن ازادوۆا ت.-نى قك-ءنىڭ 55-بابىنىڭ 4-بولىگىمەن 1,3 جىلعا باس بوستاندىعىنان ايىرۋ; گاينۋللين ر.، قك-ءنىڭ 55-بابىنىڭ 4-بولىگىمەن 3 جىلعا باس بوستاندىعىنان ايىرۋ جازاسىن تاعايىندالدى (سوت زالىندا قاماۋعا الىندى).
ر.گاينۋللينگە جازاسىن قاتاڭ تارتىپتەگى قىلمىستىق-اتقارۋ مەكەمەلەرىندە، قالعان سوتتالۋشىلار قاۋىپسىزدىگى ورتاشا قىلمىستىق-اتقارۋ مەكەمەلەرىندە وتەۋ بەلگىلەندى.
سونىمەن قاتار، سوت ۇكىمىمەن 3 سوتتالۋشى كىنالى دەپ تانىلىپ، قك-ءنىڭ 68-بابىنىڭ 2-بولىگىن قولدانا وتىرىپ، تاراپتاردىڭ تاتۋلاسۋىنا بايلانىستى قىلمىستىق جاۋاپتىلىقتان بوساتىلدى.
ەستەرىڭىزگە سالا كەتەيىك، بۇعان دەيىن ىشكى ىستەر مينيسترلىگى باحرەين كورولدىگىندە ادام ساۋداسىمەن، ونىڭ ىشىندە كامەلەتكە تولماعانداردى سەكسۋالدىق قۇلدىققا ساتۋمەن اينالىسقان قازاقستان، رەسەي فەدەراتسياسى جانە باحرەين كورولدىگى ازاماتتارىنان قۇرالعان قىلمىستىق توپتىڭ جولىن كەسكەن بولاتىن.
ۇزاق ۋاقىت بويى تۇقت جەتەكشىلەرى مەن قاتىسۋشىلارى قازاقستاننىڭ وڭتۇستىك وڭىرلەرى تۇرعىندارىنىڭ الەۋمەتتىك وسال توپتارىنان 16 مەن 25 جاس ارالىعىنداعى قىزداردى ىزدەۋمەن جانە جۇمىسقا قابىلداۋمەن اينالىسقان. اعىمداعى جىلدىڭ مامىر ايىندا اتالعان قىلمىستىق ءىس ىشكى ىستەر مينيسترلىگىنىڭ ايىپتاۋىمەن سوتقا جولدانعان بولاتىن.
"ادىرنا" ۇلتتىق پورتالى.
