قر تۇڭعىش پرەزيدەنتى – ەلباسى نۇرسۇلتان نازارباەۆ بارشا قازاقستاندىقتى تاۋەلسىزدىگىمىزدىڭ 30 جىلدىق مەرەيتويىمەن قۇتتىقتادى.
«قىمباتتى وتانداستار! ارداقتى اعايىن! قادىرمەندى حالىق! ەڭ اسىل قۇندىلىعىمىز - قاستەرلى تاۋەلسىزدىگىمىزدىڭ 30 جىلدىق تورقالى تويىمەن بارشاڭىزدى شىن جۇرەگىممەن قۇتتىقتايمىن! قازىر عانا مەنىڭ الدىمدا ەلىمىزدىڭ پرەزيدەنتى قاسىم-جومارت كەمەلۇلى بولعان ءىستىڭ ءبارىن ايتىپ، بارشا ازاماتقا ءوزىنىڭ تىلەگىن، ماعىنالى ءسوزىن جولدادى. وعان قوسىپ، ءبولىپ ايتاتىن ءسوز دە جوق. بارلىعى قامتىلدى. سوندىقتان قۇرمەتتى قاسىم-جومارت كەمەلۇلى، سىزگە شىن جۇرەگىممەن مازمۇندى بايانداماڭىز بەن ەل باسقارعان كەزدەگى مەنىڭ ەڭبەگىمە بەرگەن اسا جوعارى باعاڭىز ءۇشىن زور ريزاشىلىعىمدى بىلدىرەمىن»، - دەدى ەلباسى تاۋەلسىزدىكتىڭ 30 جىلدىعىنا ارنالعان سالتاناتتى ءىس-شارا بارىسىندا.
قر تۇڭعىش پرەزيدەنتى تاۋەلسىزدىك العان كەزەڭدەگى قيىندىقتارعا توقتالىپ ءوتتى.
«تاڭىرگە تاۋبە، كوزدەگەنىمىز بەن كوكسەگەنىمىزگە جەتتىك. كوكتەن تىلەگەنىمىز، كۇتكەنىمىز بولدى. كۇتكەن ەسەمىزدى، بارلىعىن الدىق. كەمىسىمىزدى تولتىردىق. ارۋاق قولدادى، ادىلەت ورنادى. مىڭ ءولىپ، مىڭ تىرىلگەن قاسيەتتى حالقىمىزعا قايتا كەلدىك. مىڭجىلدىقتار توعىسىندا بايىرعى مەملەكەتتىلىگىمىز قايتا جاڭعىردى»، - دەدى نۇرسۇلتان نازارباەۆ.
