QR Tuńǵysh Prezıdenti – Elbasy Nursultan Nazarbaev barsha qazaqstandyqty Táýelsizdigimizdiń 30 jyldyq mereıtoıymen quttyqtady.
«Qymbatty otandastar! Ardaqty aǵaıyn! Qadirmendi halyq! Eń asyl qundylyǵymyz - qasterli Táýelsizdigimizdiń 30 jyldyq torqaly toıymen barshańyzdy shyn júregimmen quttyqtaımyn! Qazir ǵana meniń aldymda elimizdiń Prezıdenti Qasym-Jomart Kemeluly bolǵan istiń bárin aıtyp, barsha azamatqa óziniń tilegin, maǵynaly sózin joldady. Oǵan qosyp, bólip aıtatyn sóz de joq. Barlyǵy qamtyldy. Sondyqtan qurmetti Qasym-Jomart Kemeluly, Sizge shyn júregimmen mazmundy baıandamańyz ben el basqarǵan kezdegi meniń eńbegime bergen asa joǵary baǵańyz úshin zor rızashylyǵymdy bildiremin», - dedi Elbasy Táýelsizdiktiń 30 jyldyǵyna arnalǵan saltanatty is-shara barysynda.
QR Tuńǵysh Prezıdenti Táýelsizdik alǵan kezeńdegi qıyndyqtarǵa toqtalyp ótti.
«Táńirge táýbe, kózdegenimiz ben kóksegenimizge jettik. Kókten tilegenimiz, kútkenimiz boldy. Kútken esemizdi, barlyǵyn aldyq. Kemisimizdi toltyrdyq. Arýaq qoldady, ádilet ornady. Myń ólip, myń tirilgen qasıetti halqymyzǵa qaıta keldik. Myńjyldyqtar toǵysynda baıyrǵy memlekettiligimiz qaıta jańǵyrdy», - dedi Nursultan Nazarbaev.
