مەملەكەت باسشىسى قاسىم-جومارت توقاەۆ ەل اۋماعىندا الداعى 5 جىلدا ورماندى القاپتاردا 2 ميلليارد، ال ەلدىمەكەندەردە 15 ميلليون كوشەت ەگۋدى تاپسىرعان بولاتىن. وسىنىڭ نەگىزىندە شىمكەنتتە بىرقاتار جوبا قولعا الىندى. قالانىڭ 5 جىلدىق كوگالداندىرۋ جوسپارى اياسىندا 2025 جىلعا دەيىن قالا اۋماعىندا 12,5 ملن. جاسىل جەلەك بولادى.
بۇگىندە مەگاپوليستىڭ جاسىل جەلەگى 6 ميلليوندى قۇراسا، الداعى جىلدارى تاعى 6,5 ملن. جاسىل جەلەك ەگۋ جوسپارلانۋدا. ەسەپتى كەزەڭدە 300 مىڭعا جۋىق اعاش، كوشەتتەر وتىرعىزىلدى.
شىمكەنت قالاسىندا ەكولوگيالىق اۋماقتاردىڭ قاتارى ارتىپ كەلەدى. بيىلعى جىلى قالانى اباتتاندىرۋ جانە قورشاعان ورتانىڭ ەكولوگيالىق احۋالىن جاقسارتۋ ماقساتىندا «الاتاۋ» ساياباعى پايدالانۋعا بەرىلدى. وسىلايشا شاھارداعى ساياباقتار 9-عا جەتتى.
بۇعان قوسا قالانىڭ اتموسفەرالىق اۋاسىنىڭ جاي-كۇيى جونىندە حالىقتى حاباردار ەتۋ ءۇشىن ارنايى داتچيكتەر ورناتىلىپ، 2 LED-ەكران ارقىلى تۇرعىندارعا جاريالانىپ تۇرادى.
شىمكەنت قالاسى اكىمدىگىنىڭ ءباسپاسوز قىزمەتى
