سولتۇستىك قازاقستان وبلىسىندا چەليابى-نوۆوسيبيرسك تاسجولىندا اينەگى سىنعان، وق تيگەن كولىك تابىلدى، دەپ حابارلايدى "ادىرنا" ۇلتتىق پورتالى "Tengrinews.kz"-كە سىلتەمە جاساپ.
وقيعا ورنىنان تۇسىرىلگەن سۋرەتتەر الەۋمەتتىك جەلىدە تارادى. جەلى قولدانۋشىلارى جولدا "توقسانىنشى جىلدار ستيلىندە" توبەلەس بولعان شىعار دەپ بولجادى.
"چەليابى-نوۆوسيبيرسك تاسجولىنىڭ 635 شاقىرىمىندا چيستوە اۋىلىنا جاقىن جەردە Hyundai Accent ماركالى كولىك انىقتالدى. مەملەكەتتىك تىركەۋ ءنومىرى جوق. زاقىمدانعان جەرلەرى بار. جۇرگىزۋشى جاقتاعى ەسىككە ەكى رەت بىتىرالى مىلتىقپەن وق اتقان.
بىراق جاراقات العان ادامدار جوق. ءتارتىپ ساقشىلارى كولىكتىڭ يەسىن انىقتادى. ول وبلىستىق ءبىلىم ساپاسىن باقىلاۋ دەپارتامەنتىندە تىركەلگەن. وعان پەتروپاۆل قالاسىنىڭ 25 جاستاعى تۇرعىنى جاۋاپتى. ونىڭ ايتۋىنشا، 17 جەلتوقسان كۇنى تۇنگى ساعات 22:00-دە كولىك بۇزىلىپ قالعان. ول مەملەكەتتىك تىركەۋ نومىرلەرىن الىپ، كولىكتى جول جيەگىندە قالدىرىپ كەتكەن. پوليتسەيلەر بۇل اقپاراتتى تەكسەرىپ جاتىر", - دەلىنگەن حابارلامادا.
"ادىرنا" ۇلتتىق پورتالى
