قىزىلوردا وبلىسىندا اسا اۋىر قىلمىس جاساعان كۇدىكتىلەر ۇستالدى، دەپ حابارلايدى Polisia.kz.
ەسكە سالا كەتسەك، 15 جەلتوقساندا كەشكى ساعات 18.00 شاماسىندا قىزىلوردا وبلىسىنىڭ قارماقشى اۋدانى تورەتام اۋىلىندا ءبىر توپ ەر ادام جانجالداسىپ، قارۋ قولدانعان. سالدارىنان ايالدامادا تۇرعان ءۇش ءجاسوسپىرىم وقتىڭ ۇشقىنىنان جاراقات الدى.
اتالعان دەرەك قىلمىستىق كودەكستىڭ 24-بابىنىڭ 3-بولىگى، 99-بابىنىڭ 3-بولىگى بويىنشا (ادام ولتىرۋگە وقتالۋ) تىركەلىپ، سوتقا دەيىنگى تەرگەپ-تەكسەرۋ باستالعان.
پوليتسيا قىزمەتكەرلەرى ءىزىن سۋىتپاي 8 كۇدىكتىنى انىقتاپ، ۇستادى. بۇدان بولەك، كەشەندى جەدەل-ىزدەستىرۋ ءىس-شارالارىن جۇرگىزۋ كەزىندە وق اتقان نەگىزگى كۇدىكتى قۇرىقتالدى. ول كىناسىن مويىندادى. ءتارتىپ ساقشىلارى ودان قىلمىس قۇرالىن تاركىلەدى.
9 كۇدىكتىگە قاتىستى "كۇزەتپەن ۇستاۋ" بۇلتارتپاۋ شاراسى تاڭدالىپ، ولار قاماۋعا الىندى. ءتيىستى سوت ساراپتامالارى بەلگىلەندى. قازىرگى ۋاقىتتا تەرگەۋ جالعاسىپ جاتىر.
جاسوسپىرىمدەر دەر كەزىندە اۋرۋحاناعا جەتكىزىلىپ، كومەك كورسەتىلگەن. ولاردىڭ بىرەۋى سول كۇنى قايتارىلسا، قالعان ەكەۋى دارىگەرلەردىڭ باقىلاۋىنا الىنعان. قازىرگى كەزدە جاسوسپىرىمدەردىڭ جاعدايى تۇراقتى.
”ادىرنا” ۇلتتىق پورتالى
