ۋكراينالىق دەپۋتات سەرگەي ناگورنياك جوعارعى رادا وتىرىسىنا قازاقستان تۋىنىڭ تۇستەرىنەن جاسالعان كيىممەن باردى، - دەپ حابارلايدى “ادىرنا” ۇلتتىق پورتالى Tengrinews.kz سايتىنا سىلتەمە جاساپ.
سەرگەي ناگورنياك ۋكراينانىڭ جوعارعى راداسىنا چەركاسسى وبلىسىنىڭ اتىنان شىققان. ول - "سلۋگا نارودا" ساياسي پارتياسى فراكتسياسىنىڭ مۇشەسى، قازاقستانمەن پارلامەنتارالىق بايلانىستار توبىنىڭ جەتەكشىسى.
16 جەلتوقساندا جوعارعى رادا وتىرىسىندا دەپۋتات ءسوز الىپ، ارىپتەستەرىن قازاقستان حالقىن قۇتتىقتاۋعا شاقىردى.
"بۇگىن كوپشىلىك مەنىڭ كيىمىمە نازار اۋداردى. بۇل كەزدەيسوق ەمەس. كيىمىم ءبىزدىڭ دوستاس مەملەكەتىمىز - قازاقستاننىڭ تۇسىندە. بۇگىن قازاقستان تاۋەلسىزدىك العانىنا 30 جىل تولۋىن اتاپ ءوتىپ جاتىر. مەن ولاردى جوعارعى رادا ۇجىمىنىڭ اتىنان تاۋەلسىزدىك كۇنىمەن قۇتتىقتاعىم كەلەدى. بۇگىنگى تاڭدا ءبىزدىڭ ساۋدا بالانسىمىز ءبىر ميلليارد دوللاردان ءسال از. ءبىز ونى ەكى-ءۇش ەسە ەمەس، ون ەسە ۇلعايتا الامىز دەپ ويلايمىن. ءبىزدىڭ دوستىق توبىمىز بۇگىندە 40 دەپۋتاتتان تۇرادى، بۇل ءۇشىن ءبارىمىز بىرگە جۇمىس ىستەيمىز. قازاق دوستارىمىزدى تاۋەلسىزدىك كۇنىمەن قوشەمەتپەن قۇتتىقتايمىز", - دەدى سەرگەي ناگورنياك.
ايتا كەتەيىك، ۋكراينالىق دەپۋتات كوك كوستيۋم كيگەن، جەيدەسىندە قازاقستان تۋىنىڭ ەلەمەنتتەرى بەينەلەنگەن. ول Facebook جەلىسىندەگى پاراقشاسىندا سۋرەتىن جاريالادى. وندا ناگورنياك قارا شاپان كيگەنىن دە كورۋگە بولادى.
"تاريحىمىز ورتاق، ءداستۇرىمىز ۇقساس. بىراق ەڭ باستىسى كوزقاراسىمىز ۇقساس، دەمەك، بولاشاعىمىز دا ورتاق. مەن سىزدەرگە سەنەمىن، قازاقستاننىڭ ۇلى حالقى! دوستىعىمىزدى باعالايمىن! تاۋەلسىزدىك كۇنى قۇتتى بولسىن! 30 جىلدىقپەن قۇتتىقتايمىن!", - دەپ جازدى ول.
“ادىرنا” ۇلتتىق پورتالى
