Ýkraınalyq depýtat Sergeı Nagornıak Joǵarǵy Rada otyrysyna qazaq shapanymen bardy

3870
Adyrna.kz Telegram

Ýkraınalyq depýtat Sergeı Nagornıak Joǵarǵy Rada otyrysyna Qazaqstan týynyń tústerinen jasalǵan kıimmen bardy, - dep habarlaıdy “Adyrna” ulttyq portaly Tengrinews.kz saıtyna silteme jasap. 

Sergeı Nagornıak Ýkraınanyń Joǵarǵy Radasyna Cherkassy oblysynyń atynan shyqqan. Ol - "Slýga naroda" saıası partııasy frakııasynyń múshesi, Qazaqstanmen parlamentaralyq baılanystar tobynyń jetekshisi.

16 jeltoqsanda Joǵarǵy Rada otyrysynda depýtat sóz alyp, áriptesterin Qazaqstan halqyn quttyqtaýǵa shaqyrdy.

"Búgin kópshilik meniń kıimime nazar aýdardy. Bul kezdeısoq emes. Kıimim bizdiń dostas memleketimiz - Qazaqstannyń túsinde. Búgin Qazaqstan táýelsizdik alǵanyna 30 jyl tolýyn atap ótip jatyr. Men olardy Joǵarǵy Rada ujymynyń atynan Táýelsizdik kúnimen quttyqtaǵym keledi. Búgingi tańda bizdiń saýda balansymyz bir mıllıard dollardan sál az. Biz ony eki-úsh ese emes, on ese ulǵaıta alamyz dep oılaımyn. Bizdiń dostyq tobymyz búginde 40 depýtattan turady, bul úshin bárimiz birge jumys isteımiz. Qazaq dostarymyzdy Táýelsizdik kúnimen qoshemetpen quttyqtaımyz", - dedi Sergeı Nagornıak.

Aıta keteıik, ýkraınalyq depýtat kók kostıým kıgen, jeıdesinde Qazaqstan týynyń elementteri beınelengen. Ol Facebook jelisindegi paraqshasynda sýretin jarııalady. Onda Nagornıak qara shapan kıgenin de kórýge bolady.

"Tarıhymyz ortaq, dástúrimiz uqsas. Biraq eń bastysy kózqarasymyz uqsas, demek, bolashaǵymyz da ortaq. Men sizderge senemin, Qazaqstannyń uly halqy! Dostyǵymyzdy baǵalaımyn! Táýelsizdik kúni qutty bolsyn! 30 jyldyqpen quttyqtaımyn!", - dep jazdy ol.

“Adyrna” ulttyq portaly

Pikirler